لیہ(صبح پا کستان) جی سی یونیورسٹی لاہور لیہ کیمپس میں جشن آزادی کے حوالے سے رنگا رنگ تقریب کا انعقاد، طلبا و طالبات کا ٹیبلوز، ملی نغموں کے ذریعے پاک فوج کی قربانیوں کو زبردست خراج تحسین پیش کیا گیا۔ ایمز جی سی یونیورسٹی لاہور لیہ کیمپس میں منعقدہ تقریب سے خطاب کرتے ہوئے کیمپس ڈائریکٹر پروفیسر شاہ زین رضا نے کہاکہ ارض پاک بزرگوں کی بے انتہاقربانیوں کے بعد حاصل کیا گیا جس کی تعمیر و ترقی میں ہم سب کو بڑھ چڑھ کر حصہ لینا ہو گا۔ ان کا کہنا تھا کہ پاکستان خاص مقصد کے تحت حاصل کیا گیا اب ہماری ذمہ داری ہے کہ قائد اعظم کے فرمودات کے مطابق ملک کو دنیا کا نمبر ون ملک بنا کر دم لیں۔ تقریب میں کیمپس کے طلبا و طالبات نے ٹیبلوز، ملی نغمے، تقاریر و شاعری کے ذریعے پاک فوج کی ملک کے لئے دی جا نے والی قربانیوں کو زبردست خراج تحسین پیش کرتے ہوئے ملک میں امن و امان کے قیام کے لئے فوج کے شانہ بشانہ کام کرنے کا عزم کیا۔ تقریب میں انہترویں یوم آزادی کے حوالے سے کیک بھی کاٹا گیا اور غبارے بھی ہوا میں چھوڑے گئے۔
رپورٹ ۔ مہر زاہد سرفراز واندر پریس رپورٹر
