ڈیرہ غازی خان (صبح پا کستان ) وزیر اعلیٰ پنجاب مریم نواز شریف اور سینئر وزیر پنجاب مریم اورنگزیب کے وژن کے مطابق محکمہ جنگلات پنجاب میں فارسٹ رینجرز اور انسپکٹر فارسٹ کی بھرتی کا عمل میرٹ، شفافیت اور مساوی مواقع کے اصولوں کے تحت کامیابی سے مکمل کر لیا گیا ہےترجمان محکمہ جنگلات کے مطابق ڈی جی خان فارسٹ سرکل کے اضلاع ڈیرہ غازی خان، مظفرگڑھ، راجن پور اور لیہ میں مجموعی طور پر 102 امیدواروں کا خالصتاً میرٹ کی بنیاد پر انتخاب کیا گیا۔ منتخب امیدواروں میں 79 مرد اور 23 خواتین شامل ہیں۔ ان میں 7 انسپکٹر فارسٹ جبکہ 95 فارسٹ رینجرز شامل ہیں۔ بھرتی کے پورے عمل کی نگرانی سیکرٹری فارسٹ، ڈائریکٹر جنرل فارسٹ، چیف کنزرویٹر فارسٹ جنوبی پنجاب اور کنزرویٹر فارسٹ ڈی جی خان سرکل نے کی، جبکہ تمام ڈویژنل فارسٹ افسران اور متعلقہ افسران و اہلکاروں نے اس عمل کی کامیاب تکمیل میں اہم کردار ادا کیا۔
محکمہ جنگلات کے مطابق بھرتی کے عمل میں مکمل شفافیت کو یقینی بنانے کے لیے تمام مراحل مقررہ قواعد و ضوابط کے مطابق انجام دیے گئے۔ امیدواروں کو مساوی مواقع فراہم کیے گئے اور انتخاب کا عمل مکمل طور پر اہلیت، قابلیت اور کارکردگی کی بنیاد پر مکمل کیا گیا۔حکام کا کہنا ہے کہ نئے منتخب ہونے والے امیدوار محکمہ جنگلات کے لیے ایک قیمتی انسانی سرمایہ ثابت ہوں گے۔ یہ نوجوان افرادی قوت جنگلات کے تحفظ، شجرکاری مہمات، ماحولیاتی بہتری، جنگلی حیات کے تحفظ اور عوامی خدمت کے شعبوں میں اپنی صلاحیتوں کو بروئے کار لاتے ہوئے محکمہ جنگلات کی کارکردگی کو مزید مؤثر بنانے میں اہم کردار ادا کرے گی۔محکمہ جنگلات پنجاب نے اس عزم کا اعادہ کیا ہے کہ میرٹ، شفافیت اور اچھی حکمرانی کے اصولوں کو برقرار رکھتے ہوئے عوامی خدمت اور قدرتی وسائل کے تحفظ کے لیے اپنی ذمہ داریاں مزید احسن انداز میں انجام دی جائیں گی۔
