ڈیرہ غازی خان ( صبح پا کستان )گزشتہ روز محمد علی فیڈریشن پاکستان ڈیرہ غازی خان کے ایک اعلیٰ سطحی وفد نے وفاقی وزیر برائے قومی ورثہ و ثقافت حذیفہ رحمان سے ملاقات کی۔ وفد کی قیادت چیئرمین محمد اسماعیل بھٹی نے کی جبکہ وفد میں جوائنٹ سیکرٹری صابر امام خٹک، جنرل سیکرٹری عرفان خان بزدار، پریس سیکرٹری محمد سجاد کھوکھر اور ممبر آرٹسٹ جمشید انصاری شامل تھے۔
ملاقات کے دوران وفد نے وفاقی وزیر حذیفہ رحمان کو عیدالاضحیٰ کی مبارکباد پیش کی اور ملک بھر بالخصوص جنوبی پنجاب کے فنکاروں کو درپیش مسائل سے آگاہ کیا۔ اس موقع پر جنرل سیکرٹری عرفان خان بزدار نے پنجاب اور ڈیرہ غازی خان ڈویژن کے فنکاروں کے مسائل پر مشتمل ایک تفصیلی درخواست وفاقی وزیر کو پیش کی۔
درخواست میں فنکاروں کے لیے خصوصی ہاؤسنگ کالونی کے قیام، ہیلتھ کارڈ کی فراہمی، فنکاروں کے فنڈز میں اضافہ، وفات پانے والے فنکاروں کی بیواؤں کو مالی معاونت، فنکاروں کے بچوں کے لیے معیاری تعلیمی اداروں میں داخلوں کی سہولت، فنکاروں کی رجسٹریشن کے عمل کو آسان بنانے، بین الاقوامی سطح پر پاکستانی فنکاروں کی نمائندگی کو یقینی بنانے اور پاکستان ٹیلی ویژن و ریڈیو سمیت قومی اداروں میں جنوبی پنجاب کے فنکاروں کو مناسب مواقع فراہم کرنے جیسے اہم نکات شامل تھے۔ 
وفاقی وزیر حذیفہ رحمان نے وفد کی جانب سے پیش کردہ تجاویز اور مطالبات کو انتہائی اہم قرار دیتے ہوئے یقین دہانی کرائی کہ فنکار برادری کے مسائل کے حل کے لیے عملی اقدامات کیے جائیں گے۔ انہوں نے کہا کہ فن و ثقافت سے وابستہ افراد ملک کا قیمتی سرمایہ ہیں اور ان کی فلاح و بہبود حکومت کی ترجیحات میں شامل ہے۔
وفاقی وزیر نے مزید کہا کہ پنجاب خصوصاً ڈیرہ غازی خان ڈویژن کے فنکار اور شوبز سے وابستہ افراد ان کے دل کے بہت قریب ہیں اور وہ ان کے مسائل کے حل کے لیے ہر ممکن تعاون فراہم کریں گے۔ انہوں نے وفد کو اسلام آباد میں اپنے دفتر آنے کی خصوصی دعوت بھی دی تاکہ فنکاروں کے مسائل کے حل کے لیے مزید مؤثر اور نتیجہ خیز مشاورت کی جا سکے۔
ملاقات کے اختتام پر محمد علی فیڈریشن پاکستان ڈیرہ غازی خان کی جانب سے وفاقی وزیر برائے قومی ورثہ و ثقافت حذیفہ رحمان کو تنظیم کے زیر اہتمام منعقد ہونے والی ایوارڈ تقریب میں بطور مہمانِ خصوصی شرکت کی دعوت دی گئی، جسے وفاقی وزیر نے خوش آئند قرار دیتے ہوئے اپنی بھرپور دلچسپی کا اظہار کیا۔
ثقافتی حلقوں نے اس ملاقات کو فنکار برادری کے مسائل کے حل کی جانب ایک مثبت پیش رفت قرار دیا ہے اور امید ظاہر کی ہے کہ حکومت فنکاروں کی فلاح و بہبود اور ثقافتی ترقی کے لیے مؤثر اقدامات کرے گی۔
