ڈیرہ غازی خان ۔ دریاؤں اور بڑی نہروں میں نہانے پر دفعہ 144 کے تحت پابندی عائد

ڈیرہ غازی خان (صبح پا کستان ): حکومت پنجاب کی ہدایات کی روشنی میں دریاؤں اور بڑی نہروں میں نہانے پر دفعہ 144 کے تحت پابندی ہے۔ ڈپٹی کمشنر ڈیرہ غازی خان محمد عثمان خالد کی ہدایت پر دریائے سندھ سمیت مختلف حساس مقامات پر پابندی پر سختی سے عملدرآمد کرایا جا رہا ہے۔اس سلسلہ میں ریسکیو 1122 کی واٹر ریسکیو ٹیمیں اور سول ڈیفنس کا عملہ غازی گھاٹ سمیت دیگر مقامات پر تعینات کیا گیا ہے تاکہ کسی بھی ناخوشگوار واقعہ، ڈوبنے یا ہنگامی صورتحال سے بروقت نمٹا جا سکے۔ ریسکیو اہلکار الرٹ ڈیوٹی سرانجام دے رہے ہیں جبکہ عوام سے اپیل کی گئی ہے کہ اپنی اور اپنے بچوں کی حفاظت کیلئے دریاؤں اور نہروں میں نہانے سے گریز کریں اور ضلعی انتظامیہ سے تعاون کریں۔ڈپٹی کمشنر محمد عثمان خالد نے کہا ہے کہ انسانی جانوں کا تحفظ ضلعی انتظامیہ کی اولین ترجیح ہے اس لئے دفعہ 144 کی خلاف ورزی کرنے والوں کے خلاف قانون کے مطابق کارروائی عمل میں لائی جائے گی۔