پرزن ہیلتھ کونسل لیہ کا اجلاس ،اسیرانِ جیل کی صحت سے متعلق درپیش مسائل اور دیگر انتظامی امور کا تفصیلی جائزہ لیا گیا

لیہ( صبح پا کستان) ایڈیشنل ڈپٹی کمشنر ریونیو ڈاکٹر عابدہ فرید کی زیر صدارت پرزن ہیلتھ کونسل لیہ کا اجلاس منعقد ہوا۔ اجلاس میں اسیرانِ جیل کو فراہم کی جانے والی طبی سہولیات، ادویات کی دستیابی، طبی عملہ کی کارکردگی، صحت سے متعلق درپیش مسائل اور دیگر انتظامی امور کا تفصیلی جائزہ لیا گیا۔اجلاس میں سی ای او صحت ڈاکٹر شاہد ریاض نے اسیران کو فراہم کی جانے والی طبی سہولیات کے بارے میں بریفنگ دی۔اے ڈی سی آر ڈاکٹر عابدہ فرید نے ہدایت کی کہ جیل میں قید افراد کو معیاری طبی سہولیات کی فراہمی یقینی بنائی جائے، ادویات کا مناسب ذخیرہ برقرار رکھا جائے اور مریض اسیران کے علاج معالجہ میں کسی قسم کی غفلت برداشت نہ کی جائے۔ایڈیشنل ڈپٹی کمشنر ریونیو نے کہا کہ اسیرانِ جیل کی صحت اور فلاح و بہبود حکومت پنجاب کی ترجیحات میں شامل ہے، اس ضمن میں تمام متعلقہ ادارے باہمی رابطے کے ساتھ اپنی ذمہ داریاں مؤثر انداز میں انجام دیں تاکہ قیدیوں کو بروقت اور بہتر طبی سہولیات میسر آ سکیں۔ اجلاس میں طبی خدمات کے معیار کو مزید بہتر بنانے کے لیے مختلف تجاویز کا بھی جائزہ لیا گیا اور متعلقہ افسران کو ضروری ہدایات جاری کی گئیں۔