ضلع ڈیرہ غازی خان میں خصوصی انسداد پولیو مہم کا آغاز ۔ ڈپٹی کمشنر محمد عثمان خالد نے افتتاح کیا

ڈیرہ غازی خان (صبح پا کستان ): ضلع ڈیرہ غازی خان میں خصوصی انسداد پولیو مہم کا آغاز کر دیا گیا۔ ڈپٹی کمشنر محمد عثمان خالد نے ٹیچنگ ہسپتال کے چلڈرن وارڈ میں بچوں کو پولیو سے بچاؤ کے قطرے پلا کر مہم کا باقاعدہ افتتاح کیا۔اس موقع پر سی ای او ہیلتھ ڈاکٹر عتیق الرحمن، ایم ایس ڈاکٹر منصور افغان، اے سی صدر تیمور عثمان،اے ایم ایس ڈاکٹر علی ہاشم، یونیسیف، ڈبلیو ایچ او اور دیگر متعلقہ محکموں کے افسران بھی موجود تھے۔ڈپٹی کمشنر کو بریفنگ میں بتایا گیا کہ پولیو مہم 21 مئی تک جاری رہے گی جس میں ایک روزہ کیچ اپ سرگرمی بھی شامل ہوگی۔ مہم کے دوران پانچ سال سے کم عمر کے 8 لاکھ 65 بچوں کو پولیو سے بچاؤ کی ویکسین پلائی جائے گی۔مہم کے لیے مجموعی طور پر 113 فکسڈ ٹیمیں، 2359 موبائل ٹیمیں اور 58 ٹرانزٹ ٹیمیں تشکیل دی گئی ہیں۔مجموعی طورپر 5552 تربیت یافتہ اہلکار مہم کے دوران خدمات سرانجام دے رہے ہیں۔ڈپٹی کمشنر محمد عثمان خالد نے کہا کہ پولیو کے مکمل خاتمے کے لیے مربوط حکمت عملی کے تحت تمام وسائل بروئے کار لائے جا رہے ہیں اور ہر بچے تک ویکسین کی رسائی کو یقینی بنایا جائے گا۔انہوں نے والدین سے اپیل کی کہ وہ پولیو ٹیموں سے مکمل تعاون کریں اور اپنے بچوں کو عمر بھر کی معذوری سے بچانے کے لیے پولیو کے قطرے لازمی پلوائیں۔