ڈپٹی کمشنر آصف علی ڈوگر کا ٹراما سینٹر چوک اعظم کا اچانک دورہ

لیہ، ( صبح پا کستان ) ڈپٹی کمشنر آصف علی ڈوگر کا ٹراما سینٹر چوک اعظم کا اچانک دورہ۔ جاری تعمیراتی و تزئین و آرائش کے کاموں کا تفصیلی معائنہ کیا۔ اس موقع پر ایم ایس ٹی ایچ کیو ہسپتال، متعلقہ افسران بھی ان کے ہمراہ موجود تھا۔ ڈپٹی کمشنر نے ٹراما سینٹر کے مختلف شعبہ جات، عمارت کے تعمیراتی معیار، جاری ترقیاتی سرگرمیوں اور دستیاب سہولیات کا جائزہ لیا۔ انہوں نے متعلقہ افسران کو ہدایت جاری کرتے ہوئے کہا کہ ٹراما سینٹر کی تعمیر اور تزئین و آرائش کا کام مقررہ مدت میں جلد از جلد مکمل کیا جائے تاکہ عوام کو بروقت اور معیاری طبی سہولیات فراہم کی جا سکیں۔ آصف علی ڈوگر نے کہا کہ ٹراما سینٹر چوک اعظم اور گردونواح کے عوام کی اہم ضرورت ہے، جہاں حادثات اور ایمرجنسی کی صورت میں فوری طبی امداد کی فراہمی ممکن ہو سکے گی۔ انہوں نے کہا کہ حکومت پنجاب عوام کو صحت کی بہتر سہولیات کی فراہمی کے لیے عملی اقدامات کر رہی ہے اور ٹراما سینٹر کے فعال ہونے سے شہریوں کو علاج معالجے کی جدید سہولیات مقامی سطح پر میسر آئیں گی۔ انہوں نے مزید کہا کہ منصوبے کی بروقت تکمیل سے نہ صرف مریضوں کو فوری طبی امداد فراہم ہوگی بلکہ دور دراز علاقوں سے آنے والے افراد کو بھی ریلیف ملے گا۔ ڈپٹی کمشنر نے تعمیراتی کام میں معیار اور شفافیت کو یقینی بنانے کی بھی ہدایت کی۔