لاہور ۔ قیمتی جانیں نچھاور کرنیوالے شہداء ہماری آن، بان اور شان ہیں، عثمان بزدار

لاہور ۔ یوم دفاع و شہداء پر وزیراعلیٰ پنجاب کا اپنے خصوصی پیغام میں کہنا ہے کہ 6 ستمبر 1965 کا دن پاکستان کی دفاعی تاریخ کاروشن اور قابل فخر باب ہے، اس روز پاک افواج نے بزدل دشمن کی جارحیت کا منہ توڑ جواب دیا۔

تفصیلات کے مطابق وزیراعلیٰ پنجاب سردارعثمان بزدار کا یوم دفاع کے موقع پر خصوصی پیغام میں کہنا تھا کہ 6 ستمبر 1965 کا دن پاکستان کی دفاعی تاریخ کا روشن اور قابل فخر باب ہے، پاک افواج نے بزدل دشمن کی جارحیت کا منہ توڑ جواب دیا۔ پاک دھرتی کے عظیم سپوتوں نے دفاع وطن کی خاطر بہادری کی بے مثال داستانیں رقم کیں۔

انہوں نے کہا کہ وطن کے دفاع کے جذبے سے سرشار مسلح افواج کے افسروں اور جوانوں نے دشمن کے مذموم عزائم کو خاک میں ملایا۔ تاریخ عالم پاک فوج کی بہادری کی لازوال داستانیں رقم کرنے کی کوئی دوسری مثال پیش کرنے سے قاصر ہے۔ مکار دشمن کو دندان شکن جواب دینے والے شہداء آج بھی قوم کے دلوں میں زندہ ہیں- وزیر اعلیٰ پنجاب عثمان بزدار کا پاک دھرتی کے عظیم شہداء کی لازوال قربانیوں کو شاندار الفاظ میں خراج عقیدت، ہم بحیثیت قوم شہداء کی عظیم قربانیوں کو سلام پیش کرتے ہیں، دفاع وطن کے لئے اپنی قیمتی جانیں نچھاور کرنے والے شہداء ہماری آن، بان اور شان ہیں- آج پوری قوم شہدائے وطن اور ان کے خاندانوں سے مکمل یکجہتی کا اظہار کرتی ہے-

وزیر اعلیٰ پنجاب عثمان بزدار کا کہنا تھا کہ 1965 کی جنگ میں دشمن کو دندان شکن جواب دینے والے غازیوں کو بھی سلیوٹ کرتے ہیں، ملک کے دفاع کی جنگ کے دوران قوم نے جس وحدت اور اتحاد کا مظاہرہ کیا آج پھر اسی جذبے کی ضرورت ہے، ملکی سلامتی کیلئے پوری قوم اور پاکستان کی بہادر مسلح افواج یکجان ہیں۔ وزیر اعلیٰ پنجاب کا مزید کہنا تھا کہ یوم دفاع و شہداء پر ہم اپنے مظلوم کشمیری بہن بھائیوں کے ساتھ مکمل یکجہتی کا اظہار کرتے ہیں اور ہمیں آج اس عزم کا اعادہ کرنا ہے کہ وطن کے دفاع کی خاطر اپنی جانوں کی قربانی سے بھی گریز نہیں کیا جائے گا۔