ملتان . وزیراعلیٰ عثمان بزدار کی ہدایت پر ملتان پیکج کے تحت اعلان کردہ منصوبوں پر پیش رفت کا آغاز کر دیا گیا ہے اور ڈسٹرکٹ جیل کی منتقلی اور میوزیم کی تعمیر کے لئے جگہ الاٹ کرنے کے لئے پیپر ورک شروع کردیا گیا ہے
۔ڈپٹی کمشنر علی شہزاد نے ڈسٹرکٹ جیل کی شہر سے باہر منتقلی کے لئے تین مختلف سائٹس موضع جسونت سنگھ، مین بہالپور روڈ نزد دربار پیر اسمعیل شاہ اور شیر شاہ روڈ پر واقع قطعہ اراضی کا معائنہ کیا۔انہوں نے موضع جسونت سنگھ اور مین بہاولپور روڈ میں کسی ایک جگہ جیل تعمیر کرنے کی تجویز حکومت کو ارسال کرنیکی ہدایت کردی ہے۔ڈپٹی کمشنر نے آم کے باغات کی وجہ سے شیر روڈ پر واقع قطعہ اراضی ڈسٹرکٹ جیل کو الاٹ کرنیکی تجویز مسترد کر دی ہے۔ڈسٹرکٹ جیل75 ایکڑقطعہ اراضی پر تعمیر کی جائے گی۔وزیراعلیٰ پنجاب کی ہدایت کے مطابق موجودہ ڈسٹرکٹ جیل کی جگہ ایک بڑا پارک تعمیر کیا جائے گا۔ڈپٹی کمشنر علی شہزاد نے مجوزہ میوزیم کی تعمیر کے لئے واٹر ورکس روڈ پر واقع آثار قدیمہ کے آفس سے ملحقہ ایریا کا بھی دورہ کیا۔ڈپٹی کمشنر نے میوزیم کی تعمیر کے لئے لوکیشن کو انتہائی موزوں قرار دیتے ہوئے 10 کنال رقبہ میوزیم کو الاٹ کرنے کے لئے کیس حکام کو بھجوانے کی ہدایت کر دی ہے۔ایڈیشنل ڈپٹی کمشنر ریونیو محمد طیب خان اور ریونیو افسران بھی ڈپٹی کمشنر کے ہمراہ تھے۔
