لاہور۔ پاکستان مسلم لیگ کے مرکزی رہنما و رکن قومی اسمبلی مونس الٰہی نے کہا ہے کہ تعلیمی اداروں کو ایس او پیز پر موثر عملدرآمد کیلئے درکار فنڈز فوری جاری کیے جائیں،
پاکستان مسلم لیگ نے کورونا وائرس بحران میں عوام کیلئے مثالی خدمات سرانجام دیں، تعلیمی اداروں میں ایس او پیز کی آگہی کیلئے بھی پاکستان مسلم لیگ اور ایکو فرینڈز تربیت کا اہتمام کریں، مسلم لیگی کارکن پنجاب بھر میں اپنی جان خطرہ میں ڈال کرعوام میں فیس ماسک، سینی ٹائزرز اور آگہی فراہم کرتے رہے۔ انہوں نے ان خیالات کا اظہار آج پاکستان مسلم لیگ اور ایکو فرینڈز کے تحت ہونے والی ویڈیو کانفرنس کی بریفنگ کے بعد کیا جس کا موضوع ڈیزاسٹر مینجمنٹ تھا۔ مونس الٰہی کو بریفنگ ایڈوائزر پاکستان مسلم لیگ رضوان ممتاز علی نے دی۔ بریفنگ کے دوران مونس الٰہی نے رضوان ممتاز علی کو پاکستان مسلم لیگ کو متحرک کرنے، پارٹی میں ٹیم کلچر اور ہم آہنگی کو فروغ دینے پر خصوصی مبارکباد دی۔ مو نس الٰہی نے پاکستان مسلم لیگ اور ایکو فرینڈز کے کارکنوں کو15 ستمبر سے تعلیمی اداروں میں جا کر ایس ا و پیز کی عملی تربیت کا پروگرام شروع کرنے کی ہدایت کی۔ انہوں نے کہا کہ پاکستان مسلم لیگ اور ایکو فرینڈز کے کارکن کورونا وائرس بحران کے دوران عوام کی خاطر اپنی جان خطرہ میں ڈال کرپنجاب بھر میں لوگوں میں فیس ماسک، سینی ٹائزرز اور آگہی فراہم کرتے رہے، صوبہ بھر کے رہائشی، تجارتی، صنعتی اور زرعی علاقوں میں جا کر جذبہ خدمت سے سرشار اور سیاسی وابستگی سے بالا تر ہو کر یہ کارکن عوام کی خدمت کرتے نظر آئے، پاکستان مسلم لیگ نے ریسکیو 1122 کو پنجاب کے بیشتر اضلاع میں فیس ماسک، سینی ٹائزرز اور حفاظتی لباس بھی فراہم کیے۔ ویڈیو کانفرنس میں پاکستان مسلم لیگ کے صوبہ پنجاب اور بلوچستان سے تعلق رکھنے والے نمائندوں نے شرکت کی۔
ویڈیو کانفرنس میں زبیر احمد خان، سید بلال شیرازی، غلام مصطفی ملک، ذوالفقار پپن، سہیل چیمہ، سید شاکر حسین شاہ، عرفان احسان، حسنین نصیر، عبدا لھادی اچکزئی، حق نواز سنگلہ، عارف خان روکھڑی، نورسمند بھٹی، طارق مجید چوہدری، شاہد ڈھیر اور اقرا عزیر شریک تھے۔
