لاہور ۔ پی آئی سی کے 3 ڈاکٹرز، 4 نرسز سمیت کورونا کے 9 مریض سروسز ہسپتال سے صحت یاب ہو کر گھروں کوچلے گئے۔
سی ای او پی آئی سی ثاقب شفیع کا لاہور نیوز سے خصوصی گفتگو کے دوران کہنا تھا کہ میں پرنسپل سمز پروفیسر محمود ایاز اور ان کی پوری ٹیم کا دل سے شکریہ ادا کرنا چاہتا ہوں۔
اس موقع پر پرنسپل سمز پروفیسر محمود ایاز کا کہنا تھا کہ صحت یاب ہونے والے مریضوں میں 3 ڈاکٹر، 4 نرسز تھیں جبکہ ایک ہاؤس وائف اور ایک طالب علم بھی ہیں۔ ان کا مزید کہنا تھا کہ ہم وزیر صحت پنجاب ڈاکٹر یاسمین راشد اور پنجاب ایڈوائزری گروپ کے بتائے گئے نسخوں اور ہدایات پر عمل کر رہے ہیں جس سے ہمیں مریضوں کی صحت یابی نصیب ہوئی۔
ایم ایس سروسز ہسپتال ڈاکٹر افتخار کا کہنا تھا کہ ہم تمام ڈاکٹرز اور ہمارے ساتھ تمام ہیلتھ ورکرز، ہسپتال عملہ دن رات محنت کر رہے ہیں، اللہ کے کرم اور سب کی دعاؤں کی بدولت آج ہمیں ایک اچھی خبر ملی ہے۔
