کراچی ۔ پولیس سروس آف پاکستان کے گریڈ 22 کے سینئر افسر مشتاق مہر نے سندھ کے 60 ویں انسپکٹر جنرل پولیس کی حیثیت سے عہدے کا چارج سنبھال لیا ہے۔
وزیراعلی سندھ سید مراد علی شاہ سے ملاقات کے بعد سینٹرل پولیس آفس پہنچے، نئے آئی جی سندھ کو سی پی او پہنچنے پر گارڈ آف آنر پیش کیا گیا، جانے والے آئی جی سندھ نے آنے والے آئی جی سندھ مشتاق احمد مہر کی سی پی او آمد پر انہیں خوش آمدید کہا۔
مشتاق مہر نے سابقہ آئی جی سندھ سے ملاقات کی، مشتاق مہر سے سینئر پولیس افسران بھی ملے، نئے آئی جی کا بعض نئے پولیس
افسران سے تعارف کرایا گیا، نئے آئی جی سندھ اور جانے والے آئی جی ڈاکٹر سید کلیم امام کو پولیس کے خصوصی دستے نے جنرل سلام پیش کیا۔
قبل ازیں دونوں افسران نے شہدائے پولیس کی یاد گار پر پھول چڑھائے اور فاتحہ خوانی کی، جس کے بعد مشتاق مہر نے اپنے عہدے کا باقائدہ چارج سنبھالا، مشتاق مہر اس سے قبل آئی جی ریلوے کے عہدے پر تعینات تھے۔
مشتاق مہر ایڈیشنل آئی جی ٹریفک سندھ کے عہدے پر بھی رہے اور دو مرتبہ بطور کراچی پولیس چیف خدمات انجام دے چکے ہیں۔
قبل ازیں سندھ میں تعینات نئے آئی جی پولیس مشتاق مہر نے وزیر اعلیٰ سندھ سید مراد علی شاہ سے ملاقات کی۔
نئے آئی جی پولیس مشتاق مہر نے وزیراعلیٰ سندھ سے جوائننگ کی اجازت مانگی، سید مراد علی شاہ نے عہدہ سنبھالنے کی اجازت دی۔
وزیراعلیٰ سندھ سید مراد علی شاہ نے اس موقع پر کہا کہ سندھ میں امن امان کی بحالی میں پولیس کا بڑا اہم کردار ہے، وزیراعلیٰ سندھ نے آئی جی پولیس کو صوبے میں امن امان کو بہتر کرنے کی ہدایت دی۔
پولیس عوام کے جان و مال کے تحفظ کیلئے مزید بہتر اقدامات کرے، وزیراعلیٰ سندھ سید مراد علی شاہ نے کہا کہ میں چاہتا ہوں کہ پولیس کی موجودگی عوام کیلئے باعث تحفظ ہو نہ کی پریشانی کا سبب بنے۔
نئے آئی جی پولیس نے وزیراعلیٰ سندھ کو یقین دلایا کہ صوبے میں امن امان کو مزید بہتر کیا جائے گا۔
دوسری طرف ہٹائے گئے آئی جی سندھ ڈاکٹر سید کلیم امام نے چارج چھوڑنے سے قبل اعلی سطحی ویڈیو لنک خطاب کیا۔
انہوں نے اچھا کام کرنے اور ایک ٹیم بن کر ساتھ دینے پر تمام افسران واہلکاروں کا شکریہ ادا کیا۔ کلیم امام نے کہا کہ میں امروز چارج چھوڑ کر جارہا ہوں تاہم ڈپارٹمنٹ کام کررہا ہے اور کرتا رہے گا۔
انہوں نے کہا کہ محنت لگن اور دیانت کے ساتھ کام کرتے رہیں۔سائلین کی مدد اور ان سے تعاون ترجیحی بنیاد پر کرتے رہیں۔ کلیم امام نے بعداذاں سی پی او کے اسٹاف سے بھی خطاب کیا اور یادگار شہداء پر پھول چڑھائے اور فاتحہ خوانی کی۔
