لاہور ۔ ریلوے ہیڈ کوارٹرز میں وفاقی وزیر شیخ رشید احمد کا پریس کانفرنس کرتے ہوئے کہنا تھا کہ مہنگائی ہماری سوتن ہے ہمیں اس کے خلاف لڑنا ہے۔ آٹے کا بحران سازش، چینی کا بحران اصل بحران تھا۔ مریم نواز کے باہر جانے کے راستے میں کابینہ بھی رکاوٹ ہے۔
مریم نواز اگر باہر چلے گئیں تو میرے دوست فرینڈلی اپوزیشن لیڈر شہباز شریف کو اپنی سیاست کے بارے میں سوچنا ہو گا۔ مولانا فضل الرحمن اگر اسلام آباد دھرنا دینے آئے تو اس بار دھر لیے جائیں گے۔ اگر جلسہ کرنے آئے تو سموسوں اور پکوڑوں سے استقبال کریں گے۔
وزیر ریلوے کا مزید کہنا تھا کہ دنیا کی کوئی طاقت کشمیریوں کو آزادی سے دور نہیں روک سکتی۔ بھارت میں اب پاکستان زندہ باد کے نعرے لگ رہے ہیں۔ ہماری اکنامک ٹیم گرے لسٹ سے نکلنے کی کوشش کر رہی ہے۔
وفاقی وزیر شیخ رشید احمد کا کہنا تھا کہ گوجرانوالہ شٹل ٹرین عوام کی سہولت کے لیے چلارہے ہیں۔ اس سال ریلوے کا خسارہ اور کم کر دیں گے۔ اپریل کے آخر تک کوچز کو نئی شکل دیں گے۔
