(لاہور نیوز) کرونا وائرس کےحوالے سے لاہور ایئرپورٹ انتظامیہ کا بڑا فیصلہ سامنے آ گیا۔ ائیرپورٹ انتظامیہ کی جانب سے چین سے لاہور آنے والی پرواز کو دیگر پروازوں سے الگ لینڈ کرانے کا فیصلہ کیا گیا ہے۔
طیارے کی لینڈنگ کے سلسلے میں تیاری مکمل کرنے کے حوالے سے مراسلہ ارسال کر دیا گیا ہے۔ مراسلہ کے مطابق 6 فروری کو چائنہ ساودرن کی پرواز شیڈول ہے۔ وفاقی ہیلتھ ڈیپارٹمنٹ کی ہدایت پر چائنہ کی پرواز کو دیگر پروازوں سے الگ رکھا جائے گا۔
لینڈنگ کے بعد طیارے کو بے نمبر 11 پر پارک کیا جائے گا۔ طیارے کی لینڈنگ اور مسافروں کے انخلا تک بے نمبر 10 کو خالی رکھا جائے گا۔ بے نمبر 11 اور 10 صبح 7 بجے سے لیکر مسافروں کی کلیئرنس تک باقی پروازوں کے لئے بند رہے گا۔
ذرائع کے مطابق ٹرمینل سے الگ تھلگ بے نمبر 11 ہنگامی صورتحال میں استعمال کیا جاتا ہے۔ فیصلہ کرونا وائرس سے بچاو کے لئے چینی مسافروں کو دیگر مسافروں سے الگ رکھنے کے لئے کیا گیا ہے۔
