راوالپنڈی: ترجمان پاک فوج میجر جنرل آصف غفور نے کہا ہے کہ مسلح افواج بھارتی جارحیت کا جواب دینے کے لئے ہر وقت تیار ہیں۔
پاک فوج کے شعبہ تعلقات عامہ (آئی ایس پی آر) کے مطابق بھارتی آرمی چیف منوج موکنڈ نراوانے کے بیان پر ردعمل کا اظہار کرتے ہوئے ترجمان پاک میجر جنرل آصف غفور نے کہا ہے کہ نئے بھارتی آرمی چیف کا ایل اوسی پر جارحیت سے متعلق بیان بھارتی ریاستی اداروں میں انتہا پسندی کے نظریے کی تازہ عکاسی ہے۔
ترجمان پاک فوج نے کہا ہے کہ بھارتی آرمی چیف کا ایل او سی پار فوجی کارروائی کے بیانات بیان بازی ہے، ایسے معمول کی ہرزہ سرائی ہیں، وہ اپنے لوگوں کو خوش کرنے کے لیے بیانات دے رہے ہیں، بیان بھارت کے اندرونی انتشار و حالات سے توجہ ہٹانے کی کوشش ہے، پاکستان کی مسلح افواج بھارت کی کسی بھی جارحیت کا جواب دینے کے لیے مکمل طور پر تیار ہیں، بھارت 27 فروری 2019 کو ہمارے جواب کا مزہ چکھ چکا ہے، اسے آئندہ 27 فروری سے بھی زیادہ سخت جواب ملے گا۔
میجر جنرل آصف غفور کا کہنا ہے کہ ہم مقبوضہ کشمیر میں فاشسٹ ذہنیت اورعلاقائی امن کے خطرے سے باخبر ہیں، دنیا کو بھی مقبوضہ کشمیر میں بھارتی مظالم کانوٹس لینے کی ضرورت ہے۔
واضح رہے کہ نئے بھارتی آرمی چیف جنرل منوج کی آذاد کشمیر کے حوالے سے گیدڑ بھبکیاں سامنے آئی تھی، جس میں بھارتی آرمی چیف نے کہا تھا کہ پارلیمنٹ چاہے تو آزاد کشمیر لینے کے لیے فوج کارروائی کرے گی، کشمیر بھارت کا حصہ ہے اور پارلیمنٹ میں پہلے سے قرارداد موجود ہے۔
