مولانا فضل الرحمٰن نے کہا ہے کہ گوجرانوالہ کے شہریوں! آپ نے جس ولولہ کے ساتھ آزادی مارچ کا استقبال کیا ہے، اس پر میں سلام پیش کرتا ہوں۔
جمعیت علمائے اسلام (ف) کے آزادی مارچ کا چندا قلعہ پہنچنے پر شاندار استقبال کیا گیا۔ اس موقع پر استقبالیہ کیمپ سے خطاب کرتے ہوئے مولانا فضل الرحمٰن نے کہا کہ آج پوری قوم ایک صف میں کھڑی ہے، یہ جنگ پاکستان کے عوام کو لڑنی ہے۔
انہوں نے کہا کہ ہم 25 جولائی 2018ء کے الیکشن کو تسلیم نہیں کرتے، جس امانت کو لوٹا گیا تھا ہم اس کے لیے نکلے ہیں۔
مولانا فضل الرحمٰن نے کہا کہ عوام کو دوبارہ ووٹ دے کر صحیح حقدار چننے کا حق ہے، ہم ناموس رسالت کی حفاظت، پاکستان کی بقا اور سلامتی کے لیے نکلے ہیں۔
جے یو آئی (ف ) کے سربراہ کا کہنا تھا کہ یہ نااہل حکومت ہمیں معاشی بحران سے نکال نہیں سکتی، آج پورا پاکستان مل کر اسلام آباد جائے گا۔
انہوں نے مزید کہا کہ ہم نواز شریف کی صحت کے لیے دعا گو ہیں۔
