اسلام آباد . وزیر اعظم عمران خان کشمیریوں سے اظہار یکجہتی کیلئے آج آزادکشمیر کا دورہ کریں گے اور یونیورسٹی گراﺅنڈ میں ایک بڑے عوام اجتماع سے خطاب کریں گے ۔
تفصیلات کے مطابق وزیر اعظم عمران خان آج آزاد کشمیر کا دورہ کریں گے اور یونیورسٹی گراﺅنڈ میں کشمیریوں کی بڑی تعداد سے خطاب بھی کریں گے ۔ وزیر اعظم کے دورہ آزاد کشمیر اور عوامی اجتماع سے خطاب کا مقصد بھارتی ظلم و استبداد کا شکار مقبوضہ کشمیر کے مظلوم کشمیری عوام سے اظہار یکجہتی کرناہے ۔ وزیر اعظم اپنے خطاب کے دوران کشمیریوں کی اخلاقی ، سفارتی اور قانونی مدد کے عزم کااعادہ کریں گے ۔
واضح رہے کہ مقبوضہ کشمیر کے حوالے سے پاکستان کی سول وعسکری قیادت ایک پیچ پر ہے ، وزیر اعظم عمران خان اس سے قبل بھی آزاد کشمیرمیں اپنے خطاب کے دوران اور کئی مواقع پر کشمیریوں کے لئے آخری حد تک جانے کا اعلان کرچکے ہیں جبکہ پاک فوج کی جانب سے بھی مظلوم کشمیریوں کیلئے آخری گولی اور آخری سپاہی تک لڑنے کے عزم کا متعدد بار اعادہ کیا جا چکاہے ۔
