ایم ایم روڈ پر بس اور ٹرالرمیں تصادم ، 17 افراد جاں بحق 42 زخمی
لیہ (صبح پا کستان)لیہ سے راولپنڈی جانیوالی اے سی بس ایم ایم روڈ پر ٹرالر سے ٹکرا گئی ، خوفناک حادثے میں 17 افراد جاں بحق 42 زخمی ، میتیں گھروں کو روانہ ، تفصیلات کے مطابق لیہ سے راولپنڈی کیلئے براستہ چوک اعظم میانوالی روانہ ہونیوالی مقامی ٹرانسپورٹ کمپنی کی اے سی بس ایم ایم روڈ پر قصبہ ہرنولی کے قریب ٹرالر سے ٹکرا گئی ۔ حادثہ اس قدر خوفناک تھا کہ بس کے پرخچے اڑ گئے ، پٹرولنگ پولیس ہرنولی موڑ کی فراہم کردہ معلومات کے مطابق حادثے میں ڈرائیور اور کنڈیکٹر سمیت 17 افراد جاں بحق ہوئے جبکہ 42 مسافر شدید زخمی ہوئے ، زخمیوں اور میتوں کو گاڑی کی باڈی کاٹ کر نکالا گیا معلومات کے مطابق حادثہ اوورٹیکنگ کے دوران سامنے سے آنیوالے ٹرالر سے ٹکرانے پر پیش آیا ۔ وفات پانیوالوں میں بس نمبری 6555 کے ڈرائیور کرم حسین کا تعلق تحصیل چوبارہ جبکہ کنڈیکٹر جمشید کا تعلق ہیڈ مست علی تحصیل چوبارہ سے تھا ، حادثے میں بس کا ہلیپر محمد اصغر وڑائچ بھی زخمی ہوا ، حادثے میں مرنے والے زیادہ افراد کا تعلق ایم ایم روڈ پرواقع قصبہ حافظ والا ، ہنگو ، دلے والا، میانوالی اور فتح پور کے قریبی چک 217 ٹی ڈی اے سے تھا ۔ ریسکیو ٹیموں نے میتیں ورثاءکے حوالے کردیں جبکہ حادثے میں زخمی ہونیوالوں کو قریبی ہسپتالوں میں منتقل کردیا گیا جن میں سے 8 افراد کی حالت تشویشناک بنائی جاتی ہے ۔
