ڈیرہ غازیخان (صبح پا کستان).وزیراعلیٰ بلوچستان جام میر کمال خان کی بارتھی میں وزیراعلیٰ پنجاب عثمان بزدار کی آبائی رہائش گاہ آمد۔وزیراعلیٰ بلوچستان نے سردار عثمان بزدار سے ان کے والد سردار فتح محمد خان بزدار کی وفات پر دکھ اور افسوس کا اظہارکرتے ہوئے مرحوم سردار فتح محمد خان بزدار کی روح کے ایصال ثواب کیلئے فاتحہ خوانی بھی کی۔انہوں نے مرحوم کے درجات کی بلندی اور لواحقین کے لیے صبر جمیل کی دعاکی. جام میر کمال خان نے سردار فتح محمد خان بزدارکی سماجی و سیاسی میدان میں خدمات کو خراج عقیدت پیش کیا انہوں نے کہاکہ سردار فتح محمد خان بزدار ایک قدر آور سیاسی و سماجی شخصیت تھے اورعلاقہ کے لوگو ں کی فلاح وبہبود کیلئے مرحوم کی خدمات تا دیر یاد رکھی جائیں گی۔انہوں نے کہاکہ سردار فتح محمد خان بزدار کی علاقے کیلئے تعلیمی، فلاحی اور سیاسی خدمات ناقابل فراموش ہیں اورسردار فتح محمد خان بزدار کے انتقال سے قبائلی علاقہ ایک شفیق بزرگ سے محروم ہو گیا ہے۔ بلوچستان سے تعزیت کیلئے آنے والے وفد میں ڈپٹی سپیکر بلوچستان اسمبلی بابر موسیٰ خیل، سینیٹر منظور کاکڑ، صوبائی وزراء زمرک خان اچکزئی، سردار عبدالرحمن کھیتران ، میر نصیب اللہ، میر سکندر علی عمرانی ،مشیر مبین خلجی اور دیگر اہم شخصیات شامل تھیں۔اس موقع پراراکین اسمبلی جاوید اخترلنڈ، خواجہ داؤد، سابق رکن اسمبلی سردار سیف الدین کھوسہ، ایڈیشنل چیف سیکرٹری پنجاب اور دیگر شخصیات بھی موجود تھیں۔
دریں اثنا مقامی سرداروں، قبائلی عمائدین اور علاقے کے دیگر لوگوں نے کثیر تعداد میں بارتھی میں وزیراعلیٰ پنجاب عثمان بزدار سے ان کے والد سردار فتح محمد خان بزدار کے انتقال پر تعزیت کا اظہارکیا.مقامی لوگ سردار فتح محمد خان بزدار مرحوم کو یاد کرکے آبدیدہ ہو گئے . انہوں نے کہاکہ بزدار قبیلے کے سربراہ کی وفات پر علاقے کی فضا سوگوارہے . تعزیت کیلئے آنے والے لوگوں نے مرحوم کی سماجی و سیاسی خدمات کو خراج عقیدت پیش کیا. انہوں نے کہاکہ سردار فتح محمد خان بزدار مرحوم ہمارے لئے شفیق باپ کی مانند تھے انہوں نے کہاکہ مرحوم تعلیمی، سیاسی اور سماجی خدمات کی بدولت ہمیشہ ان کے دلوں میں زندہ رہیں گے.
سردار عثمان بزدار سے ان کے والدسردار فتح محمد خان بزدار کی وفات پر اظہار تعزیت کرنے والوں میں عظمت چیمہ ،فیاض ا لحسن چوہان ، سابق وزیر اعلی بلوچستان سرفراز بگٹی کے بھائی میر جان بگٹی ،ڈپٹی سپیکر پنجاب اسمبلی سردار دوست محمد مزاری، اقبال چنڑ ، سردار شبیر احمد خان لغاری ، سابق صوبائی وزیر جیل خانہ جات احمد یار ہنجرا، کمشنر بہاولپور اور ڈپٹی کمشنر رحیم یار خان کے علاوہ دیگر سیاسی وسماجی شخصیات بھی شامل تھیں.
