پاکستان نے بھارت سے اخلاقی جنگ جیت لی ہے، وزیراعلیٰ پنجاب

لاہور . وزیر اعلیٰ پنجاب عثمان بزدار نے کہا ہے کہ بھارتی پائلٹ کی رہائی کے اعلان سے پاکستان نے بھارت سے اخلاقی جنگ جیت لی ہے اور وزیر اعظم عمران خان نے اپنے عمل سے ثابت کر دیا کہ پاکستان امن پسند ملک ہے۔ انہوں نے کہا کہ جذبہ خیر سگالی کے تحت بھارتی پائلٹ کی رہائی کے اعلان کا عالمی برادری نے بھی خیر مقدم کیا ہے۔ وزیر اعظم عمرا ن خان نے امن کیلئے جرات مندانہ اقدامات کر کے دنیا کو مثبت پیغام دیا ہے کیونکہ پاکستان امن کا خواہاں ہے اور امن کی ہی جیت ہو گی۔ وزیر اعلیٰ نے کہا کہ موجودہ صورتحال میں سیاسی جماعتیں ہم آواز اور متحد ہیں اورملکی سالمیت اور وطن کے دفاع کیلئے پوری قوم افواج پاکستان کے شانہ بشانہ کھڑی ہے۔ مادر وطن کے وقار، سلامتی اور خود مختاری پر کوئی آنچ نہیں آنے دیں گے۔ انہوں نے کہا کہ بھارت کے جھوٹ کا بھانڈا بیچ چوراہے پھوٹ گیا ہے اوربھارتی قیادت شکست کی خفت کا شکار ہو چکی ہے۔ انہوں نے کہا کہ سکوارڈن لیڈر حسن صدیقی پاکستان کی پوری قوم کا فخر ہیں۔ ان خیالات کا اظہار وزیراعلیٰ پنجاب عثمان بزدار نے رکن قومی اسمبلی ریاض فتیانہ اور رکن پنجاب اسمبلی حامد یار ہراج سے ملاقات کے دوران کیا، جنہوں نے ان سے وزیراعلیٰ آفس میں ملاقات کی۔