اسلام آباد: پارلیمانی رہنماؤں کا ان کیمرا اجلاس پارلیمنٹ ہاؤس اسلام آباد میں جاری ہے جس میں ڈی جی آئی ایس پی آر کی جانب سے بھارتی جارحیت پر بریفنگ دی جارہی ہے۔
ایکسپریس نیوز کے مطابق بھارتی جارحیت پر پارلیمانی رہنماؤں کا ان کیمرہ اجلاس جاری ہے جس میں آرمی چیف جنرل قمر جاوید باجوہ، وزیر خارجہ شاہ محمود قریشی، چیئرمین سینیٹ صادق سنجرانی، اسپیکر قومی اسمبلی اسد قیصر شریک ہیں۔
قائد حزب اختلاف شہبازشریف، شریک چیئرمین پیپلز پارٹی آصف علی زرداری اور دیگر اپوزیشن رہنماؤں کے علاوہ ڈی جی آئی ایس پی آر میجر جنرل آصف غفور اورسیکریٹری خارجہ تہمینہ جنجوعہ بھی شریک ہیں۔
ڈی جی آئی ایس پی آر میجر جنرل آصف غفور کی جانب سے بھارتی جارحیت اور پاکستان کے منہ توڑ جواب پر پارلیمانی رہنماؤں کو ان کیمرہ بریفنگ دی گئی۔
وزیر خارجہ شاہ محمود قریشی نے بھی پارلیمانی رہنماؤں کو نیشنل کمانڈ اجلاس کے فیصلوں سے آگاہ کیا اور دوست ممالک سے رابطوں پر بریفنگ دیتے ہوئے کہا کہ عالمی برادری سے مثبت جواب مل رہا ہے، پاکستان نے بھارت کو امن کا واضح پیغام دیا۔
