کرسی کے چکر اور نادرا آفس کوٹ سلطان … از تحریر ۔ملک ابوذر منجوٹھہ

لاہور بھی عجب سحر انگیز شہر ہے جہاں کی شامیں اپنا ہی رنگ رکھتی ہیں میں ماڈل ٹاؤن پارک میں ایک بنچ پر بیٹھا دور تک پھیلی ہریالی کو دیکھ رہا تھا کہ مجھے کوٹ سلطان سے ایک بزرگ کی کال آئی بابا جی سے ادھر اُدھر کا حال احوال ہوا انہوں نے ایک بات پوچھی مجھ سے کہ بیٹا کیا کرسی کے چکر میں لوگوں کو دیے چکر وں کوخدا کیا معاف کر دے گا؟میں نے کہا نہیں ۔میں نے پوچھا کہ خیر تو ہے باباجی آپ یہ کیوں کہ رہے ہیں تو انہوں نے کہا کہ میں نے اپنی بیوی اور بہو کا شناختی کارڈ بنوانا ہے بیٹا فیکڑی میں نوکری کرتا ہے تو یہ ذمہ داری بھی میری ہے تو میں نے کہا کہ آپ چلے جائیں کوٹ سلطان میں بھی تو نادرا آفس موجود ہے انہوں نے کہا نہیں وہ بند ہوگیا ہے اب مجھے صبح کی نماز پڑھ کر لیہ نادرا آفس جانا ہوگا ۔وہاں لائن لگ جائیں گے اگر باری آئے گی تو ٹھیک ورنہ پھر اگلے دن چلے جائیں گے وہاں بڑا رش ہوتا ہے ۔ میں نے کہا کہ وجہ کیا ہے کیوں بند ہوا ہے اس نے کہا اس لیے تو بیٹا میں نے وہ چکر والی بات پوچھی ہے آپ خود ہی پتہ کروا لیں کہ کیوں بند ہوا ہے کوٹ سلطان نادرا آفس ۔میں نے اس سلسلہ میں بہت سے مقامی لوگوں سے رابطہ کیا ۔عبداللہ نظامی صاحب اور ملک فہیم صاحب نے بہت سے چشم کشا انکشاف کیے پھر نادرا آفس کوٹ سلطان میں کام کرنے والے آفیسرز سے رابطے کیے انہوں نے بھی بہت کچھ بتایا۔ نادرا آفس کوٹ سلطان جو کہ سابقہ ایم این اے سید ثقلین شاہ بخاری کوٹ سلطان کی عوام کے بھرپور مطالبہ پر لے کر آئے تھے انہوں نے کوٹ سلطان یونین کونسل میں جگہ دی اور نادراآفس نے وہاں اپنے سٹاف کے لوگ دیے یہ آفس پہاڑپور یونین کونسل ،بکھری احمد خان، بیٹ وساوا شمالی ،172/TDA،کوٹ سلطان ، 164-A/TDAاور جکھڑ یونین کونسل کے لوگوں کو سہولت فراہم کر رہا تھا۔ یہاں عملے کی کمی کی وجہ سے روزانہ 60سے 70لوگوں کو سروس دی جاتی تھی جو کہ ایک مہینہ میں 2100-2500کے قریب لوگ بنتے ہیں ان لوگوں سے نادراآفس چھیننے کا مطلب ان سے ان کی شناخت چھین لینا ہے کیونکہ لیہ نادراآفس 22کلومیٹر دور ہے جہاں رش کی وجہ سے صبح بہت جلدی جانا پڑتا ہے ۔بہت سے لوگ اس وجہ سے وہاں جانے سے کتراتے ہیں اور خصوصا عورتوں کے لیے جانے کا مسئلہ ہوتا ہے کہ ان کی ایک کارڈ کے لیے دو بندے جاتے ہیں اورجو مرد ساتھ جاتا ہے اس کو بھی اپنی مزدروری اور روزی چھوڑ کر جانا پڑتا ہے اس طرح اگر وہ کوٹ سلطان نادرا آفس کسی عورت کے شناختی کارڈ کے لیے آتی تھیں تو وہ کسی ہمسائی یا کسی بڑی بوڑھی کے ساتھ آ جاتی تھیں جس سے آسانی سے شناختی کارڈ بھی بن جاتا تھا پہلے بھی بہت بارمیڈیا میں آیا کہ کوٹ سلطان نادراآفس پر سہولیات کا بہت فقدان ہے یہ عملہ کے رویہ کا مسئلہ ہے وہ ساری چیزیں بات کرنے سے حل بھی ہو سکتی ہیں اور سہولیات نہ ہونے کا گزارا بھی چل جاتا تھا لیکن اب کی بار مسئلہ واپڈا سے شروع ہوا کہ انہوں نے یونین کونسل کا بل عدم ادائیگی کی وجہ سے کاٹا نادراآفس کا اپنا تو کوئی میٹر تھا نہیں یونین کونسل آفس کا میٹر ہی نادرا آفس میں استعمال ہو رہا تھا ۔واپڈا نے میٹر کاٹا تو یونین کونسل والوں نے ڈائریکٹ تار لگا دی چیئرمین صاحب نے اپنے اوپر بات آنے دینے سے پہلے خود ہی جا کر تھانہ میں درخواست دے دی کہ نادرا آفس بجلی چوری کر رہا ہے واپڈا نے بھی کسی تحقیق کیے بغیر نادرا آفس کے نئے انچارج جن کو کچھ ہی عرصہ ہوا تھا چارج سنبھالے ہوئے کے خلاف پرچہ دے دیا ۔ چیئرمین صاحب کہتے ہیں کہ ان کو پتہ ہی نہیں تھا کہ نادرا آفس کو بجلی ان کے آفس سے جاتی ہے جبکہ ایک صحافی کے بقول جس دن ان کے وائس چیئر مین صاحب کو نادرا آفس کے گارڈ نے اس وجہ سے روکا تھا کہ آج عورتوں کا دن ہے اور آج صرف عورتوں کو آفس آنے کی اجازت ہے اس کی پاداش میں آفس کی بجلی چیئر مین صاحب نے کٹوا دی تھی جو کہ بیچ بچاؤ کروانے پر کچھ دنوں میں بحال کر دی گئی ۔ اس پرچہ کے بعد نادرا کے ڈی جی صاحب نے آفس کو شفٹ کر کے لیہ بھیجنے کے احکامات دے دیے ۔پھر چیئرمین صاحب نے سیاسی کھیل کھیلا اور مسجد میں اعلان کروا کر لوگوں کو اکھٹا کروا دیا کہ سامان نہ لے جانے دیا ۔نادرا کا مطالبہ ہے کہ ہمیں میٹر الگ لگا کے دیا جائے پرچہ ختم کروایا جائے کیونکہ ہم قصوار بھی نہیں ہیں نہ ہم نے چوری کی بجلی استعمال کی ہے نہ کوئی ایسا کام کیا ہے۔ چیئرمین صاحب کا مطالبہ ہے کہ نادرا آفس بند ہوتا ہے تو ہوتا رہے ہماری بلڈنگ کو خالی کروائیں ۔ عوام کا مطالبہ ہے کہ ہمیں ذلالت سے بچایا جائے ۔یہ کھیل رکے گا کیسے ؟نادرا آفس کھلے گا کیسے ؟مقامی تاجرتنظیموں نے اپنی مدد آپ کے تحت سنٹر کے لیے پرائیویٹ بلڈنگ اور بجلی کا بل ادا کرنے کا کہاہے؟لیکن وہ ادارہ جو لوگوں سے پیسے وصول کریں اس کو مفت کی بلڈنگ اور مفت کی بجلی نہیں لینی چاہیے۔مقامی ایم پی اے ، ایم این اے کی خاموشی کیوں ہے ؟ یہ سارے سوال عوام کے ذہنوں میں ہیں ڈی جی نادرا کو اس پر ایکشن لینا چاہیے عوامی سہولت کے لیے سنٹر کو کھلوانے عملہ کوبڑھانا اور رویہ بھی ٹھیک کرنے کی ہدایات دینی ہوں گی۔شکریہ بابا اشفاق کی اس دعا کے ساتھ اللہ پاک آپ کو آسانیاں دیں اور آسانیاں تقسیم کرنے کا شرف بخشیں آمین