چوک اعظم ۔کرکٹ ایسوسی ایشن کا قیام ،سابق نائب ناظم سردار اظہر خان کھیتران چیئرمین منتخب

چوک اعظم ( صبح پا کستان )چوک اعظم کرکٹ ایسوسی ایشن کا قیام ۔کرکٹ کے فروغ کے لیے سنجیدہ اقدامات اُٹھائے جائیں گے ۔جنرل سیکرٹری محمد عدیل اظہر ۔تفصیل کے مطابق چوک اعظم میں کرکٹ ایسوسی ایشن کا قیام عمل میں لایا گیا ۔ایسوسی ایشن کے جنرل سیکرٹری محمد عدیل اظہر سمراء نے میڈیا سے گفتگو کرتے ہوئے بتایا کہ دو سال کے لیے ایسوسی ایشن کے عہدیداران مقرر کیے گئے ہیں۔ایسوسی ایشن کے چیئرمین سابق نائب ناظم چوک اعظم سردار اظہر خان کھیتران ،وائس چیئرمین سلیم اللہ سکھیرا،صدر بشیر تبسم ،نائب صدر انا خورشید احمد ،فنانس سیکرٹری ڈاکٹر مقصود احمد ،میڈیا کوآرڈینیٹرزصابر عطاء تھہیم ،مرزارضوان بیگ اور انا اعظم ،اور دیگر شامل ہیں ۔انہوں نے بتایا کہ چوک اعظم میں کرکٹ کا فروغ چاہتے ہیں اور اس کے لیے ہم نے ہمیشہ مثبت اقدامات اُٹھائے ہیں ۔ہمارے کلب کے زیرِاہتمام چوک اعظم کی تاریخ میں پہلی با ر سپورٹس ایوارڈز تقسیم کیے گئے اس تقریب میں ان کھلاڑیوں کو بھی شامل کیا گیا جو پہلے کھیلتے رہے ۔انہوں نے خورشید شاہ اسٹیڈیم کے حوالے سے سوال کا جواب دیتے ہوئے کہاکہ تعمیر کا کام تکمیل کے آخری مراحل میں ہے اور جلد ہی وہ اسٹیڈیم ان کے کلب کے حوالے کر دیا جائیگا ۔انہوں نے بتایا کہ اگست میں پنجاب سطح کا بہت بڑا سپورٹس گالا منعقد کیا جائے گا ۔