ڈیرہ غازیخان (صبح پا کستان) کمشنر ڈیرہ غازیخان ڈویژن احمد علی کمبوہ نے کہا ہے کہ ترقیاتی منصوبوں کو بروقت مکمل کیا جائے . مٹیریل کے معیار پر ہرگز سمجھوتہ نہیں کیا جائے گا جاری منصوبوں کیلئے مطلوبہ فنڈز بلاتاخیر طلب کیے جائیں . انہوں نے یہ ہدایات ڈویژنل کوآرڈینیشن کمیٹی کے اجلاس میں مظفرگڑھ اور لیہ اضلاع کے ترقیاتی منصوبوں کے جائزہ کے دوران جاری کیں . اجلاس میں مظفرگڑھ اور لیہ اضلاع کے ڈپٹی کمشنرز سیف انور ، سید واجد علی شاہ ، ایڈیشنل کمشنر کوآرڈینیشن اظفر ضیاء ، وائس چیئرمین مظفرگڑھ قاسم ہنجرا ، اسسٹنٹ ڈائریکٹر پلاننگ وسیم اختر جتوئی ، ایس ای شیخ فضل کریم ، ملک محمدنواز ، ڈائریکٹرز ڈاکٹر الطاف حسین ، اظہر حسین چانڈیہ ، ایکسیئن ، سی ای اوز سمیت متعلقہ محکموں کے افسران نے شرکت کی. کمشنرنے لوکل گورنمنٹ کے سڑکوں کے منصوبوں کا تخمینہ چیک کرنے کیلئے کمیٹی تشکیل دینے اور ضلع مظفرگڑھ میں غیر منظور شدہ سکیموں کی حقیقت جاننے کیلئے انکوائری کے بھی احکامات جاری کیے . کمشنر کی طرف سے ایس ڈی جیز پروگرام کے تحت میپکو کے پہلے تین فیز کے بجلی کے فراہمی کے نئے منصوبے 15جنوری اور تمام منصوبوں کیلئے 31مارچ 2018کی ڈیڈ لائن دے دی گئی . اجلاس میں بتایاگیاکہ دونوں اضلاع میں صوبائی سالانہ ترقیاتی پروگرام 2017-18 کے تحت 3468منصوبوں پر 32ارب 18کروڑ روپے خرچ کیے جار ہے ہیں . ضلع مظفرگڑھ میں 183منصوبوں میں سے 177کی منظوری دے دی گئی ہے 158پر کام شروع ہے . 162کے فنڈز جاری کر دیئے گئے ہیں 165نئے منصوبوں کیلئے دس ارب 60کروڑ روپے کا تخمینہ لگایاگیاہے جن میں سڑکوں کے 113، پبلک ہیلتھ کے 40او ربلڈنگز کے سات منصوبے شامل ہیں . اسی طرح 80جاری منصوبوں پر تیز رفتاری سے کام کیاجارہاہے جن پر تقریباچار ارب روپے کا تخمینہ لگایاگیاہے . وزیر اعظم ایس ڈی جیز پروگرام کے تحت چار مراحل میں 56منصوبوں پر 29کروڑ روپے خرچ کیے جارہے ہیں جن میں سے آٹھ منصوبے مکمل کر لیے گئے ہیں . اسی طرح لوکل گورنمنٹ کی ایس ڈی جیز پروگرام کی 688 سکیموں پر دو ارب ساڑھے تین کروڑ روپے خر چ کیے جا رہے ہیں . ضلع مظفرگڑھ میں بجلی کی فراہمی کے 891منصوبوں کیلئے 76کروڑ 60لاکھ روپے کا تخمینہ لگایاگیا ہے . اجلاس میں بتایاگیاکہ ضلع مظفرگڑھ میں مجموعی طو رپر 1880منصوبوں پر 17ارب 67کروڑ روپے خرچ کیے جارہے ہیں اسی طرح ضلع لیہ میں 1588منصوبوں کیلئے ساڑھے 14ارب روپے کا تخمینہ لگایاگیاہے جن میں صوبائی سالانہ ترقیاتی پروگرام 2017-18کی 40نئی اور 39جاری سکیموں پر 11ا رب 63کروڑ روپے اور ایس ڈی جیز پروگرام کے تحت لوکل گورنمنٹ کے 688منصوبوں پر دو ارب روپے سے زائد کا تخمینہ لگایاگیا ہے .
