مزدور محمد اجمل ہونٹوں کی عجیب بیماری میں مبتلا
جمن شاہ (صبح پاکستان)چک نمبر148کا رہائشی مزدور محمد اجمل ہونٹوں کی عجیب بیماری میں مبتلا ہو گیا، دوسال قبل ہونٹ پر ہونے والی سوزش سے شہری بولنے، کھانے ، پینے کے دوران تکلیف کا سامنا، ڈاکٹروں نے لاہور کے ہسپتالوں سے علاج تجویز کر دیا۔ نچلے ہونٹ پر ہونے والی سوزش کے باعث مزدور محمد اجمل کو ہر وقت درد جبکہ ہونٹ میں پیپ بھرنے سے شدید تکلیف کا سامنا کرنا پڑ رہا ہے۔ شہری محمد اجمل نے میڈیا سے گفتگو کرتے ہوئے کہا کہ ہونٹ پر بننے والی عجیب سوزش نے اس کی زندگی تکلیف دہ بنا دی ہے، کھانے ، پینے، بولنے میں بھی شدید مشکلات کا سامنا کرنا پڑتا ہے اور اب سوزش اتنی بڑھ چکی ہے کہ لوگ میرا چہرہ دیکھنے سے بھی نفرت کر تے ہیں اس نے کہاکہ لیہ، ملتان کے ڈاکٹروں سے متعدد بار چیک اپ کرایا مگر کچھ افاقہ نہ ہوا تو انہوں نے مجھے لاہور ریفر کیا جبکہ میں غریب مزدور شخص ہو ں اور گزشتہ چھ ماہ سے مزدوری بھی نہیں کر پا رہا ۔ محمد اجمل نے وزیر اعلی پنجاب میاں شہباز شریف، بحریہ ٹاؤن کے سربراہ ملک ریاض و دیگر مخیر حضرات سے اپیل کی ہے کہ علاج کرانے میں مدد کی جائے۔
کم سردی پڑنے کے باعث پولٹری، گرم کپڑوں ، کوئلہ کے کارروبار متا ثر
جمن شاہ(صبح پا کستان ) گزشتہ سالوں کی نسبت کم سردی پڑنے کے باعث پولٹری، گرم کپڑوں ، کوئلہ کے کارروبار سے وابستہ شدید خسارے سے دوچار ہو گئے، حکومت کارروبار بہتر کرنے کے لئے معاونت کر ے ، کارروبار سے وابستہ افراد کا مطالبہ۔امسال سردی نہ پڑنے سے موسم سے وابستہ افراد کا کارروبار شدید مالی بحران کا شکار ہو گیا۔ ملک بھر میں پولٹری کی صنعت سے وابستہ افراد بڑے خسارے سے دوچار نظر آتے ہیں، انڈوں کی فروخت و قیمتوں میں مندی، برائیلر مرغی کے گوشت کا کم استعمال نے پولٹری کے کارروبار کو زوال تک پہنچا دیاہے جس سے بڑے بڑے پولٹری فارم مالکان کارروبار ختم کرتے نظر آتے ہیں۔ سردی کم پڑنے کی وجہ سے موسم سے قبل گرم کپڑوں کا سٹاک رکھنے والے دوکاندار ، ڈیلرز کم کپڑا فروخت ہونے کے باعث شدید پریشان ہیں ، لنڈ ے کے کارروبار سے وابستہ ڈیلرز بھی سیل لگانے کے باوجود گرم کپڑوں کی فروخت میں مکمل طور پر ناکام نظر آئے جبکہ کوئلہ کی فروخت میں بھی نمایاں کمی واقع ہو ئی ہے۔ پولٹری، گرم کپڑوں، کوئلہ و دیگر کارروبار سے وابستہ افراد نے حکومت سے مطالبہ کیا کہ ان کی مالی معاونت کی جائے ۔
پاکستان تحریک انصاف کی ممبر سازی مہم عروج پر
جمن شاہ (صبح پا کستان )پاکستان تحریک انصاف کی ممبر سازی مہم عروج پر پہنچی گئی، رہنماؤں کا ہزاروں کی تعداد میں ممبر بننے کا دعوی۔ پی ٹی آئی کی جاری ممبر سازی مہم کے مرحلے میں کارکنان نے مختلف مقامات پر ممبر سازی کیمپ لگائے جا رہے ہیں جس کے نتیجے میں تحصیل لیہ سے پچاس ہزار کے لگ بھگ ممبر بن چکے ہیں ان خیالات کا اظہار تحریک انصاف کے رہنماؤں مہر شاہد اقبال میلوانہ، مہر ثناء اللہ واندر، محمد اعظم سوکی نے مہم کے دوران میڈیا سے خصوصی گفتگو کرتے ہوئے کیا۔ ان کا کہنا تھا کہ شہری ملک میں بڑھتے ہوئے مسائل کے حل اور اسلامی فلاحی ریاست کے قیام کے لئے عمران خان کا انتخاب کرتے ہوئے ممبر سازی مہم میں بڑھ چڑھ کر حصہ لیں۔ ان کا کہنا تھا کہ اب وقت آگیا ہے کہ کرپٹ اور ملک کھانے والے سیاستدانوں کو پیچھے دھکیل کر نئے پاکستان کے قیام کے لئے شہری عمران خان کا بھر پور ساتھ دیں۔ اس موقع پر کارکنان کی بڑھ تعداد موجود تھی جنہوں نے عمران خان کے حق میں نعرے لگائے۔
لدھانہ کی طالبات کا منفرد اعزاز ، ایم اے سوشیالوجی پارٹ فرسٹ کے امتحان میں پہلی چھ پوزیشنز
جمن شاہ (صبح پا کستان)ہمت جواں تو کامیابیاں ہی کامیابیاں، لدھانہ کی طالبات کا منفرد اعزاز، ایم اے سوشیالوجی پارٹ فرسٹ کے امتحان میں پہلی چھ پوزیشنز ،شہریوں کا پرنسپل ساجد کریم میلوانہ کو مبارکباد، شہر میں مٹھائیاں تقسیم کی گئیں۔ لیہ کے پسماندہ ترین قصبہ لدھانہ کے کالج لدھانہ کالج آف سوشل سائنسز کی طالبات رخسانہ بی بی نے پانچ نمبروں میں سے رخسانہ بی نی348نمبر حاصل کر کے پہلی، نجمہ کوثر نے 343نمبر حاصل کرکے دوسری، نغمہ بی بی ، عائشہ اقبال نے 340نمبر حاصل کر کے تیسری سدرہ بشیر نے 336نمبر حاصل کر کے چوتھی جبکہ 333نمبر حاصل کر کے پانچویں پوزیشن حاصل کر کے ریکارڈ قائم کر دیا۔شاندار کامیابی پر شہریوں نے پرنسپل ساجد کریم میلوانہ، شاہد اقبال میلوانہ ، طالبات اور والدین کو مبارکباد پیش کی جبکہ شہریوں نے پرنسپل کو مٹھائیاں بھی پیش کیں۔
