ڈیرہ غازیخان(صبح پا کستان ) مظفرگڑھ، لیہ اور راجن پور اضلاع میں فصلات سے شوگر ملز تک 27سڑکوں کے منصوبوں کی مشروط منظوری دے دی گئی ہے جن پر تقریبا 78کروڑ روپے خرچ کیے جائیں گے . منصوبوں کی منظوری کمشنر ڈیرہ غازیخان ڈویژن احمد علی کمبوہ کی زیر صدارت ڈویژنل شوگر کین ڈویلپمنٹ سیس کمیٹی کے اجلاس میں دی گئی . کمشنر نے کہا کہ ٹی ایس ٹی کی بجائے خادم پنجاب دیہی روڈز پروگرام کی طرز پر کارپٹڈ روڈز تجویز کیے جائیں. ترقیاتی منصوبوں کی بروقت تکمیل کیلئے افسران فیلڈ میں نکلیں . مٹیریل کے معیار پر سمجھوتہ نہیں کیا جائے گا. کمشنر نے کہاکہ اجلاس میں متعلقہ افسران شریک ہوں . انہوں نے اجلاس میں پبلک ہیلتھ انجینئرنگ کے افسران کی عدم شرکت پر متعلقہ سیکرٹری کو اظہار ناراضگی اور اعلی افسران کی بجائے ایس ڈی اوانہار کی اجلاس میں شرکت پر برہمی کا اظہار کرتے ہو ئے ایس ڈی اوکو اجلاس میں بیٹھنے سے منع کر دیا . کمشنر احمد علی کمبوہ نے 55کروڑ 81لاکھ روپے سے ضلع لیہ کی 14سڑکوں ، آٹھ کروڑ 38لاکھ روپے سے ضلع لیہ کی چھ اور 13کروڑ روپے سے ضلع راجن پو رکی پانچ سڑکوں کی مشروط منظوری دی . منظور شدہ سکیموں میں شیخو شوگر ملز کی پانچ ، فاطمہ شوگر ملز اور تاندلیاں والا شوگر ملز کی دو ، دو او رکاشتکاروں کی سڑکوں کی سات سکیمیں شامل ہیں . اہم منصوبوں میں ضلع مظفرگڑھ کی سنانواں لنگر سرائے روڈ ، مظفرگڑھ کینال پل اور بڈھ والا تا اڈہ لعل میر ، سنانواں کاشف آباد تا محمود کوٹ ، منہان تا سنانواں ، سیم نالہ تا کھر غربی ، سنانواں محمود کوٹ روڈ تا فاطمہ شوگر ملز ، مظفرگڑھ تا شاہجمال براستہ بائی پاس تاعثمان کوریہ ، دوبلی موڑ تا بیٹ مندو ، بھادل چوک تا اڈہ لعل میر ، عنی والا چوک تا بائی پاس پرہار روڈ ، کوٹ ادو بائی پاس تا پل چانڈیہ ، بنگلہ ہنجرائی تا بند سنانواں ، بنگلہ ہنجرائی روڈ تا بستی وٹو ، سنانواں تا کھر غربی ، جھنب چوک تا شیخ عمر روڈ شامل ہیں اجلاس میں لیہ او ر مظفرگڑھ کے ڈپٹی کمشنرزبالترتیب سید واجد علی ، سیف انور ، ڈائریکٹر ڈویلپمنٹ شعیب طارق وڑائچ ، اسسٹنٹ ڈائریکٹر فنانس وسیم اختر جتوئی ، ایس ای ہائی ویز شفاقت حسین ، سمیت دیگر متعلقہ افسران شریک تھے .
