قومی/ بین الاقوامی خبریں

کوئٹہ: بلوچستان کے ضلع نوشکی کے علاقے میں قومی شاہراہ 40 پر نامعلوم افراد نے 2 واقعات میں 9 مسافروں سمیت 11 افراد کو قتل کردیا جن کا تعلق پنجاب سے تھا۔ ایکسپریس نیوز کے مطابق ڈپٹی کمشنر نوشکی حبیب اللہ موسٰی خیل نے بتایا کہ ایک درجن سے زائد نامعلوم افراد نے قومی شاہراہ کو بند کرکے نہ رُکنے پر ایک کار پر فائرنگ کی۔ فائرنگ کے نتیجے میں ٹائر برسٹ ہونے سے گاڑی اُلٹ گئی جس سے اس میں سوار ایک شخص جاں بحق اور 4 افراد زخمی ہوگئے ۔ گاڑی الٹنے اور فائرنگ سے زخمی ہونے والا ایک شخص بعدازاں اسپتال میں دم توڑ گیا۔ ڈپٹی کمشنر کوئٹہ کے مطابق حملہ آوروں کی فائرنگ کی زد میں آکر ایک موٹرسائیکل سوار بھی زخمی ہوا۔ دوسرے واقعے میں مسلح افراد نے ایک بس کو روکا اور شناختی کارڈ چیک کرنے کے بعد اس میں سوار 9 مسافروں کو اُتار کر اغوا کرلیا اور قریبی پہاڑوں کی طرف فرار ہوگئے۔ بعدازاں کچھ فاصلے پر ایک پُل کے نیچے سے اغوا ہونے والے تمام 9 مسافروں کی لاشیں ملیں جنہیں گولیاں مار کر قتل کیا گیا۔ ڈپٹی کمشنر کوئٹہ کا کہنا ہے کہ ملزمان کی تلاش کے لیے پولیس، ایف سی اور دیگر سکیورٹی فورسز نے علاقے میں سرچ آپریشن شروع کردیا ہے۔ وزیراعظم محمد شہباز شریف نے بس مسافروں کے اغواء کے بعد قتل کے اندوہناک واقعہ کی شدید الفاظ میں مذمت کی۔ وزیراعظم نے اس لرزہ خیز واقعہ پر گہرے دکھ اور افسوس کا اظہار کرتے ہوئے مقتولین کے لواحقین سے اظہار تعزیت کیا۔ انہوں نے مقتولین کے لئے فاتحہ خوانی اور ان کی بلندی ء درجات کی دعاء کی۔ وزیراعظم نے واقعے کی رپورٹ طلب کرتے ہوئے کہا کہ رنج کی اس گھڑی میں سوگوار خاندانوں کے ساتھ کھڑے ہیں، دہشتگردی کی اس واقعے کے مجرموں اور ان کے سہولت کاروں کو قرار واقعی سزا دی جائے گی، دہشت گردی کے عفریت کو جڑ سے اکھاڑ پھینکیں گے۔ مقتول نوجوان یورپ کے لیے ڈنکی لگانے جا رہے تھے اطلاعات کے مطابق نوشکی میں قتل ہونے والے 9 افراد میں سے ایک نوجوان کا تعلق وزیرآباد کے گاؤں چوڑا سے ہے۔ واسق فاروق یورپ جانے کے لیے ڈنکی لگانے جا رہا تھا۔ دوسرے نوجوان کا تعلق گوجرانوالہ سے ہے۔ شاہزیب قلعہ دیدار سنگھ کا رہائشی تھا ۔ جاں بحق افراد تین روز قبل گھروں سے روانہ ہوئے تھے دونوں افراد ایران کے راستے غیر قانونی طور پر یورپ جانا چاہتے تھے ۔ حادثے کی اطلاع ملنے پر گھروں میں صف ماتم بچھ گئی۔ پولیس کے مطابق بس سے اتار کر اغوا کیے گیے 9 مسافروں کی لاشیں ایک پل کے نیچے سے مل گئیں مرنے والوں کا تعلق پنجاب سے بتایا جاتا ہے جو کوئٹہ سے تفتان جارہے تھے۔