قومی/ بین الاقوامی خبریں

لاہور (ویب ڈسک ) قائم مقام سپیکر ظہیر اقبال چنڑ نے حکومتی رکن حسان ریاض کو تھپڑ مارنے والے اپوزیشن رکن خالد نثار ڈوگر کی رکنیت پنجاب اسمبلی اجلاس کی 15 نشستوں کے لئے معطل کر دی ہے۔
ظہیر اقبال چنڑ کا کہنا ہے میں سپیکر پنجاب اسمبلی ملک محمد احمد خان کی رولنگ کو بائی پاس نہیں کر سکتا۔ یہ بات خالد نثار ڈوگر یا حسان ریاض کی نہیں ، اس ایوان کے تقدس کی بات ہے۔ یہ کوئی سبزی منڈی نہیں، ایسے رویوں سے دنیا کو کیا پیغام جائے گا۔
ڈپٹی اپوزیشن لیڈر معین قریشی نے احتجاج کرتے ہوئے کہا اگر یہ معاملہ ہوا ہے تو کسی نے شروع کیا تو ہوا۔کارروائی کرنی ہے تو دونوں کے خلاف کریں۔ جس پر قائم مقام سپیکر ظہیر اقبال چنڑ نے کہا ایوان کے تقدس کو بحال رکھنا میری ذمہ داری ہے۔ ایک ممبر دوسرے ممبر کی سیٹ پر اٹھ کر گیا۔
اپوزیشن کے رکن اسمبلی شیخ امتیاز نے خالد نثار ڈوگر کی معطلی پر ہنگامہ آرائی کی تو قائم مقام سپیکر ظہیر اقبال چنڑ نے شیخ امتیاز کی بھی رکنیت اجلاس کی 15 نشستوں کے لئے معطل کر دی۔
یاد رہے کہ پنجاب اسمبلی میں آج ہو نے والا اجلاس ایک بار پھر ہنگامہ آرائی کی نظر ہو گیا۔ اپوزیشن رکن خالد نثار ڈوگر نے حکومتی رکن حسان ریاض کو تھپڑ مار دیا۔ہاتھاپائی کا واقعہ اس وقت پیش آیا جب حکومتی رکن حسان ریاض ڈپٹی اپوزیشن لیڈر کی تقریر کے دوران بول رہے تھے۔
ایوان میں غیر پارلیمانی حرکت کے بعد اجلاس بدنظمی کا شکار ہو گیا۔ جس پر ڈپٹی سپیکر نے اجلاس کچھ دیر کے لئے ملتوی کر دیا ۔حکومتی اور اپوزیشن ارکان کو اپنے چیمبر میں بلا لیا۔اپوزیشن ارکان غیر پارلیمانی حرکت کے بعد ایوان میں نعرے بھی لگاتے رہے۔