لیہ(زاہد واندر سے )ویٹرنر ی ہسپتال کوٹ سلطان سے ڈاکٹر غائب، ادویات ندارد، شکایت پر ڈاکٹر نے مویشی پال حضرات کو جھاڑ پلادی، توہین آمیز رویہ کے خلاف شہری نے سیکرٹری لائیوسٹاک نسیم صادق سمیت ڈسٹرکٹ لائیو سٹاک آفیسر کو شکایت کر دی، سیکرٹری ، ڈی ایل او کا سخت نوٹس، معاملہ کی تحقیق کرنے کی حامی بھرلی، جانوروں کا علاج نہ ہونے پر مویشی پال حضرات کا شدیدا حتجاج، ڈاکٹر کے تبادلہ کا مطالبہ۔ تفصیل کے مطابق ضلع بھر میں منہ کھر سمیت دیگر جانوروں کے موذی امراض کے پھیلنے اور کروڑ میں 8جانوروں کی ہلاکت پر کوٹ سلطان، حافظ آباد و دیگر علاقوں کے مویشی پال حضرات جانوروں کی بیماری کے حوالے سے کوٹ سلطان میں موجود ویٹرنری ہسپتال آئے تو ڈاکٹر کی عدم موجودگی پر ڈاکٹر کو فون کر کے بلایا گیا جس پر ڈاکٹر سیخ پا ہو گیا کہ میں اپنی پرائیویٹ کلینک پر جانوروں کا علاج معالجہ کروں یا سرکاری ہسپتال میں یہاں کچھ نہیں ہے آپ کسی پرائیویٹ ہسپتال چلے جائیں ۔ ادویات کے مطالبہ پر انچارج ہسپتال ڈاکٹر فرخ نے عملہ کے ساتھ مل کر مویشی پالوں کو کھری کھری سناتے ہوئے فوری نکل جانے کا کہا جس پر مویشی پال حضرات نے ہسپتال میں دیئے گئے نمبر ز پر سیکرٹری لائیوسٹاک نسیم صادق، ڈی ایل او محمد طارق کو فون کر کے شکایت درج کرائی تو اعلی افسران نے ڈاکٹر کے خلاف کارروائی کی یقین دہانی کرادی۔مویشی پال جام نبیل ،احمر جام،محمد شیر حیدر،زین عباس،محمد فیاض ،محمد اشرف اور دیگر نے احتجاج کرتے ہوئے کہا کہ جانوروں کی موذی مرض کے علاج کے لئے ہم ہسپتال آئے تو ہمارا ساتھ نازیبا سلوک کیا گیا، انہوں نے انچارج ویٹرنری ہسپتال کے تبادلہ کا مطالبہ کیا ہے۔