Tag: multam news

ملتان (صبح پا کستان )ملتان ویسٹ مینجمنٹ کمپنی نے عیدالاضحیٰ کے موقع پر شہر بھر میں میگا صفائی آپریشن کیلئے جامع پلان تشکیل دے دیا ہے ۔ چیف ایگزیکٹو آفیسر ذوالفقار احمد نے عیدالاضحیٰ پر صفائی انتظامات کے حوالے سے پریس کانفرنس کرتے ہوئے بتایا کہ عید آپریشن کیلئے 9 ہزار سے زائد ورکرز تعینات کئے جائیں گے جبکہ صفائی آپریشن میں 2 ہزار کے قریب مشینری، ٹریکٹر ٹرالیاں اور ڈمپر حصہ لیں گے۔ انہوں نے کہا کہ ملتان شہر میں 30 جبکہ شجاع آباد اور جلال پور پیر والا میں 15،15 آگاہی کیمپس قائم کئے جائیں گے اور ہر یونین کونسل میں شہریوں کی رہنمائی کیلئے خصوصی آگاہی کیمپ لگایا جائے گا۔ سی ای او ذوالفقار احمد کے مطابق قربانی آلائشیں تلف کرنے کیلئے 30 عارضی کلیکشن پوائنٹس قائم کئے جائیں گے جہاں برانڈنگ، قناتوں اور صفائی کے خصوصی انتظامات کئے جائیں گے۔ انہوں نے بتایا کہ شہری شکایات کے فوری ازالے کیلئے کنٹرول روم میں 15 افراد پر مشتمل عملہ 24 گھنٹے موجود رہے گا جبکہ شہریوں کی سہولت کیلئے ہیلپ لائن نمبرز اور واٹس ایپ سروس بھی فعال رکھی جائے گی۔ انہوں نے مزید کہا کہ ستھرا پنجاب پروگرام کا مرکزی ہیلپ لائن نمبر 1139 بھی عید کے دنوں میں مکمل طور پر فعال رہے گا جبکہ قربانی بیگز کی تقسیم کا مکمل ریکارڈ مرتب کیا جائے گا تاکہ شفافیت کو یقینی بنایا جا سکے۔ملتان: چیف ایگزیکٹو آفیسر ذوالفقار احمد نے کہا ہے کہ عیدالاضحیٰ کے دوران قربانی آلائشوں کی بروقت تلفی اور شہر کو صاف ستھرا رکھنے کیلئے جامع آپریشنل حکمت عملی تیار کرلی گئی ہے۔ انہوں نے بتایا کہ شہر بھر میں قائم قربان گاہوں پر ویسٹ مینجمنٹ کمپنی کا عملہ تعینات ہوگا جو شہریوں کو بائیو ڈیگریڈیبل بیگز فراہم کرے گا تاکہ آلائشوں کو محفوظ انداز میں جمع کرکے ٹھکانے لگایا جاسکے۔ ان کا کہنا تھا کہ پرائمری ویسٹ کلیکشن کے تحت گلی محلوں سے آلائشیں اکٹھی کی جائیں گی جبکہ سیکنڈری کلیکشن کے ذریعے انہیں عارضی کلیکشن پوائنٹس منتقل کرکے بعد ازاں ڈمپ سائٹس پر تلف کیا جائے گا۔ ذوالفقار احمد نے کہا کہ عید کے دنوں میں کنٹرول روم مکمل طور پر فعال رہے گا، واٹس ایپ نمبرز اور حکومت پنجاب کی ہیلپ لائن 1139 پر موصول ہونے والی شکایات کا فوری ازالہ کیا جائے گا اور کسی بھی مقام پر شکایت موصول ہونے کی صورت میں دو گھنٹوں کے اندر صفائی یقینی بنائی جائے گی۔ انہوں نے کہا کہ عارضی ڈسپوزل سائٹس پر بھی خصوصی صفائی، چونے کا چھڑکاؤ اور ڈس انفیکٹنٹ واش کیا جائے گا تاکہ جراثیم اور بدبو کا خاتمہ ممکن بنایا جاسکے۔ سی ای او ویسٹ مینجمنٹ کمپنی نے مزید بتایا کہ تمام ورکرز کو بروقت تنخواہیں ادا کردی گئی ہیں تاکہ عید صفائی آپریشن موثر انداز میں جاری رکھا جاسکے۔