لیہ (صبح پا کستان) ڈپٹی ڈائریکٹر کالجزپروفیسر خادم حسین ملک نے کہا ہے کہ کشمیریوں کی حق خود ارادیت کے حصول کیلئے غیر متنزل اور ولولہ انگیز جدوجہد کامیاب و کامران ہوگی اور پاکستان کے 18کروڑ عوام کی کشمیری بھائیوں کی جدوجہد کے ساتھ کامل وابستگی کا عملی اظہار یوم یکجہتی کشمیر کی تقاریب کا انعقاد ہے ۔یہ بات انہوں نے یوم یکجہتی کشمیر کے موقع پر گورنمنٹ کالج لیہ میں سیمینارسے خطاب کرتے ہوئے کہی ۔سیمینار کی صدارت اے ڈی سی جرنل محبوب احمد نے کی۔ سیمینارمیں پرنسپل مہرا ختر وہاب،اے ڈی کالجز پروفیسر سجاد حسین رونگھہ،قاضی امین اللہ ،پروفیسر شبیرنیئر،پروفیسر ز ،لیکچرار و طالب علموں نے شرکت کی۔سیمینار سے خطاب کرتے ہوئے اے ڈی سی جرنل محبوب احمد نے کہا کہ کشمیر پاکستان کی شہ رگ ہے پاکستانی عوام اور کشمیری یک جان دو قالب ہیں ، پاکستانی و کشمیری یکساں مذہبی ، تہذیبی ، ثقافتی ، تاریخی ورثہ کے امین ہیں ۔ انہوں نے کہا کہ کشمیریوں نے 1948ء سے غاصبانہ قبضے اور ناجائز تسلط کیخلاف جو شاندار تاریخ رقم کی ہے وہ اس امر کی غماز ہے کہ کشمیری جلد حق خود ارادیت کی منزل پالیں گے ۔پروفیسر مہر اختر وہاب نے کہا کہ کشمیریوں کی جدوجہد کو کامیابی و کامرانی سے ہمکنار کرنے کیلئے پاکستانی عوام اخلاقی ، سیاسی ، سفارتی تائید و حمایت کا سفر جاری رکھیں گے ۔ انہوں نے اس عزم مصمم کا اظہار کیا کہ کشمیر جلد پاکستان کا حصہ بنے گا ۔ تقریب سے خطاب کرتے ہوئے پروفیسر سجاد حسین رونگھہ نے کہا کہ حکومت پاکستان مسئلہ کشمیر کے پر امن حل کیلئے علاقائی و عالمی فورم پر موثر طور پر اجاگر کررہی ہے اور پاکستان کی خارجہ پالیسی کا بنیادی محور کشمیریوں کے حق خود ارادیت کے حصول کو یقینی بنانا ہے ۔سیمینار سے خطاب کرتے ہوئے پروفیسر شبیر نیئر و امین اللہ قاضی نے خطاب کرتے ہوئے کہا کہ کشمیر کی سرزمین زعفران اور وادی چنار کے نام سے جانی جاتی تھی مگر آج کا کشمیر غاصبانہ فوجوں کی آماجگاہ بن کر رہ گیا ہے اور آج کشمیر کا چپہ چپہ لاکھوں کشمیریوں کے لہو کی سرخی سے بھرا ہوا ہے ۔ انہوں نے کہا کہ کشمیریوں کی بہادرانہ اور ولولہ انگیز جدوجہد ، غاصبانہ تسلط کے خاتمے پر منتج ہوگی اور کشمیریوں کی اس جائز جدوجہد کی کامیابی و کامرانی کیلئے پاکستان کے 18 کروڑ عوام سیاسی و سفارتی جدوجہد جاری و ساری رکھیں گے ۔ سیمینار سے طالب علموں علی سحر،محمد یوسف ،شیرہ رحمن نے بھی خطاب کیا۔
