ڈیرہ غازیخان(صبح پا کستان).ضلع ڈیرہ غازیخان کے تعلیمی اداروں میں کلاس رومز سمیت بنیادی سہولیات کی فراہمی کے 1806منصوبوں پر تقریبا دو ارب روپے خرچ کیے جا رہے ہیں . خطرناک قرار دیئے جانے والے سکولوں کی 171سکیموں پر 40کروڑ 67لاکھ 74ہزار روپے ، چاردیواری ، بیت الخلاء ، پانی و بجلی سمیت بنیادی سہولیات کی فراہمی کے 234منصوبوں پر 22کروڑ 90لاکھ روپے اور خادم پنجاب سکولز پروگرام کے تحت 667تعلیمی اداروں میں 1401اضافی کلاس رومز کی تعمیر پر ایک ارب 35کروڑ 50لاکھ روپے خرچ کیے جائیں گے . یہ بات ڈپٹی کمشنر اللہ رکھا انجم کی زیر صدارت اس سلسلے میں منعقدہ اجلاس کو بتائی گئی . ڈپٹی کمشنر نے کہاکہ تعلیمی اداروں میں بہتر سہولیات کی فراہمی اور منصوبوں کی کڑی نگرانی ہماری ذمہ داری ہے . تعلیمی اداروں کی سکیورٹی اور معیارتعلیم پر ہرگز سمجھوتہ نہیں کیا جائے گا. تعلیمی اداروں کے سربراہان سے آئی ٹی و کمپیوٹر لیبز کو فنکشنل کرنے اور ضروری آلات کی فراہمی کے حوالے سے سر ٹیفکیٹ طلب کیے جائیں . اساتذہ سمیت ہر سکول میں کلاس کی سطح پر بچوں کی تعداد کے حوالے سے بھی رپورٹ فراہم کی جائے. تعلیمی اداروں میں شجرکاری سمیت دیگر ترقیاتی منصوبے ذاتی دلچسپی سے مکمل کیے جائیں . اجلاس میں چیف ایگزیکٹو آفیسر ڈسٹرکٹ ایجوکیشن اتھارٹی عبدالغفار لنگاہ و دیگر افسران نے محکمہ تعلیم سے متعلق بریفنگ دیتے ہوئے بتایاکہ ضلع ڈیرہ غازیخان میں حساس قرار دیئے جانے والے تمام تعلیمی اداروں میں سکیورٹی انتظامات مکمل کر لیے گئے ہیں . نجی تعلیمی اداروں میں بھی سکیورٹی چیک کی جاتی ہے . ناقص انتظامات پر تعلیمی سرگرمیوں کو معطل کر دیاجائے گا . اجلاس کوبتایاگیاکہ ضلع ڈیر ہ غازیخان میں پرائمری سے ہائر سکینڈری سکول تک 1697سرکاری اور 763رجسٹرڈنجی تعلیمی ادارے کام کر رہے ہیں . سرکاری تعلیمی اداروں میں 126لیبز قائم کی گئی ہیں . اجلاس میں ایڈیشنل ڈپٹی کمشنر جنرل محمد اقبال مظہر ،ڈی ایم او غلام یاسین ، ڈی ای او سکینڈری شوکت علی شیروانی ، ڈی ای او ایلیمنٹری مہر سراج الدین ، فرزانہ سجاد بخاری ، ڈپٹی ڈی ای او مبین جاوید سمیت دیگر افسران موجودتھے .
ایک اور اجلاس کی صدارت کرتے ہو ئے ڈپٹی کمشنر کا کہنا تھا کہ ضلع ڈیرہ غازیخان میں عوام کو بہتر سہولیات اور پر امن ماحول فراہم کرنے کیلئے کردار ادا کیا جائے گا. محکمہ صحت ، میونسپل کارپوریشن اور کمیٹیز مل کر کام کریں . شہر اور دیہاتوں میں آوارہ اور پاگل کتوں کو محفوظ طریقے سے تلف کیا جائے اس سلسلے میں ضروری ادویات اور آلات کی موجودگی کے حوالے سے رپورٹ پیش کی جائے
اجلاس کو بتایاگیا کہ شہری علاقوں میں میونسپل کارپوریشن و کمیٹیاں جبکہ دیہی علاقوں میں محکمہ ہیلتھ مہم میں حصہ لیتے ہے . مہم کی کامیابی اور عوام میں آگاہی پیدا کرنے کیلئے تشہیر کی جائے گی. اجلاس میں ایڈیشنل ڈپٹی کمشنر جنرل محمد اقبال مظہر، چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر منورعباس ، چیف آفیسر ز خالد محمود قمر ، فرمائش علی چودھری ، عنایت ا للہ اور اسسٹنٹ محمد یونس سمیت متعلقہ افسران موجود تھے
