پنجاب کونسل آف دی آرٹس ڈیرہ غازی خان کے زیرِ اہتمام محفلِ سلام و منقبت

ڈیرہ غازی خان(صبح پا کستان )پنجاب کونسل آف دی آرٹس، ڈیرہ غازی خان ڈویژن کے زیرِ اہتمام محرم الحرام کی مناسبت سے محفلِ سلام و منقبت کا انعقاد ادبی بیٹھک میں کیا گیا۔ ڈائریکٹر آرٹس کونسل مقبول احمد رانا نے کہا کہ محفل کا مقصد نواسہ رسول صل اللہ علیہ وآلہ وسلم،اہلِ بیتِ اطہار اور دیگر شہدائے کربلا کی عظیم اور لازوال قربانیوں کو خراجِ عقیدت پیش کرنا اور واقعہ کربلا کے آفاقی پیغام کو اجاگر کرنا ہے۔محفل میں وسیب کے نامور شعرائے کرام عزیز شاہد، اسلم وارثی، مرتضیٰ ناظر، فضل عباس ظفر، محبوب حسین جھنگوی، یاسین بلوچ، عمران اکمل عمران، کلیم اللہ ثاقب اور احسن نے اپنے دلنشین سلام، مناقب اور منظوم نذرانہ عقیدت پیش کیے۔ شعراء نے اپنے کلام کے ذریعے شہدائے کربلا کی بے مثال قربانیوں، حق و صداقت کے لیے ان کی جدوجہد اور اسلامی تاریخ میں ان کے عظیم کردار کو نہایت مؤثر انداز میں اجاگر کیامحفل کی نظامت کے فرائض معروف شاعر محبوب حسین جھنگوی نے انجام دیے۔ تقریب میں شعراء، ادباء، دانشوروں، ادب دوست شخصیات اور شہریوں کی بڑی تعداد نے شرکت کی۔ شرکاء نے پنجاب کونسل آف دی آرٹس، ڈیرہ غازی خان کی جانب سے ادبی و فکری پروگراموں کے انعقاد کو سراہتے ہوئے کہا کہ یہ سرگرمیاں نہ صرف فروغِ ادب میں معاون ہیں بلکہ قومی، مذہبی اور ثقافتی اقدار کے فروغ میں بھی اہم کردار ادا کرتی ہیں۔محفل کے اختتام پر شہدائے کربلا کے درجات کی بلندی، ملک میں امن و استحکام اور قومی یکجہتی کے لیے خصوصی دعا بھی کی گئی۔