ملتان: (صبح پاکستان) ایڈیشنل چیف سیکرٹری جنوبی پنجاب فواد ہاشم ربانی کی خصوصی دعوت پر میٹرک کے امتحانات میں شاندار کارکردگی دکھانے والے ہونہار طلبہ ہارون حامد اور حافظ عبداللہ نے جنوبی پنجاب سیکرٹریٹ بہاولپور کا دورہ کیا۔
ہارون حامد نے 1193 نمبر لے کر نہ صرف ملتان بورڈ بلکہ صوبہ پنجاب کے تمام تعلیمی بورڈز میں سب سے زیادہ نمبر حاصل کرنے کا اعزاز حاصل کیا۔ حافظ عبداللہ نے ملتان ایجوکیشن بورڈ میں تیسری پوزیشن حاصل کی۔ دونوں طلبہ کا تعلق تحصیل دنیاپور سے ہے۔
ایڈیشنل چیف سیکرٹری فواد ہاشم ربانی نے دونوں طلبہ کا پرتپاک استقبال کیا اور انہیں پھولوں کے گلدستے پیش کئے۔ اس موقع پر پولیس کے چاک و چوبند دستے نے ملی نغموں کی دھنوں پر سلامی پیش کر کے طلبہ کی حوصلہ افزائی کی۔
ایڈیشنل چیف سیکرٹری نے اس موقع پر گفتگو کرتے ہوئے کہا کہ "ہارون حامد اور حافظ عبداللہ جیسے ہونہار طلبہ جنوبی پنجاب کا فخر ہیں۔ یہ نوجوان مستقبل میں پاکستان کے روشن ستارے بنیں گے۔ جنوبی پنجاب کے ہونہار طلبہ و طالبات ملک و قوم کا اصل سرمایہ ہیں۔ نوجوان نسل کی کامیابیاں ہمارے روشن مستقبل کی ضمانت ہیں۔ جنوبی پنجاب سیکرٹریٹ ہر شعبے میں ابھرتے ہوئے ٹیلنٹ کی بھرپور سرپرستی اور حوصلہ افزائی جاری رکھے گا۔”
ایڈیشنل چیف سیکرٹری نے دونوں طلبہ کو اعلیٰ کارکردگی پر کیش ایوارڈ سے نوازا۔
اس موقع پر ہارون حامد کے والد حامد علی شریف، حافظ عبداللہ کے والد خورشید عالم اور سپیشل سیکرٹری سی اینڈ ڈبلیو آفتاب پیر زادہ بھی موجود تھے۔
