لاہور ۔ چوبرجی کے علاقے میں نجی بینک کی عمارت گر گئی، ملبے تلے دب کر ایک شخص جاں بحق،11 افراد زخمی جبکہ تین کی حالت نازک بتائی جا رہی ہے۔
ریسکیو ٹیموں نے موقع پر پہنچ کر امدادی کارروائیوں کا عمل شروع کر دیا ہے۔ ذرائع کے مطابق سات زخمیوں کو ثریا عظیم ہسپتال منتقل کر دیا گیا
لاہور نیوز ٹی وی کے مطابق چوبرجی کے علاقے میں نجی بینک میں ہونے والے دھماکے کی سی سی ٹی وی فوٹیج منظرعام پر آگئی۔ سی سی ٹی وی فوٹیج میں دیکھا جا سکتا ہے دھماکے کے بعد نجی بینک کی عمارت گر جاتی ہے۔ شیشے ٹوٹنے سے موٹرسائیکل سوار کو زخمی ہو کر گرتے دیکھا جا سکتا ہے۔
خیال رہے کچھ دیر قبل چوبرجی میں نجی بینک کی پوری عمارت زمین بوس ہو گئی تھی جہاں پر ملبے تلے دب کر ایک شخص جاں بحق اور 11 زخمی ہوئے۔ 3 افراد کی حالت نازک بتائی جا رہی ہے۔ زخمیوں کو ثریا عظیم ہسپتال منتقل کردیا گیا تھا۔ سی سی ٹی وی فوٹیج میں دیکھا جا سکتا ہے کہ عمارت کے نیچے کھڑی گاڑیاں، موٹر سائیکلیں اور رکشے تباہ ہو گئے۔
