لاہور ۔ کورونا ٹاسک فورس کے سربراہ ڈاکٹر عطا الرحمان نے کہا ہے کہ سمارٹ لاک ڈاؤن کا طریقہ کار کامیاب رہا، اب ہمیں عیدالاضحی کے دوران احتیاط کرنا ہوگی۔
نجی ٹی وی دنیا نیوز کے پروگرام میں گفتگو کرتے ہوئے سربراہ کورونا ٹاسک فورس ڈاکٹر عطا الرحمان کا کہنا تھا کہ کورونا کےخلاف لڑنے کا واحد راستہ ویکسین ہے لیکن دنیا میں ابھی تک اس کے ٹرائل ہی کیے جا رہے ہیں۔
انہوں نے بتایا کہ اگلے چار سے چھ ماہ پاکستان میں ویکسین کے ٹرائل کے ہونگے۔ تاہم کونسی ویکسین کامیاب ہوتی ہے ٹرائل کے بعد پتا چلے گا۔ امید ہے اگلے ہفتے تک ڈریپ سے ٹرائل کی اجازت مل جائے گی۔
ڈاکٹر عطا الرحمان کا کہنا تھا کہ تیرہ جون کو کیسز کی پیک تھی، تاہم اب اموات اور کیسز کی تعداد میں کمی ہوئی ہے۔ سمارٹ لاک ڈاو¿ن کا طریقہ کار کامیاب رہا، اب ہمیں عیدالاضحی کے دوران احتیاط کرنا ہوگی۔ بچے بزرگ افراد سے نہ ملیں کیونکہ زیادہ تر اموات بھی بڑے لوگوں کی ہو رہی ہے۔
پاکستان بھر میں کورونا وائرس کی وجہ سے بند تعلیمی اداروں بارے پوچھے گئے سوال کا جواب دیتے ہوئے ان کا کہنا تھا کہ پندرہ ستمبرسے سکولز کھولنے کا ارادہ ہے تاہم ستمبر کے پہلے ہفتے میں اس حوالے سے مشاورت ہوگی۔
