لاہور . تحریک انصاف کے مرکزی سیکرٹری جنرل عامر محمود کیانی اور چیف وہپ قومی اسمبلی عامر ڈوگر کی وزیراعلیٰ پنجاب سے ملاقات ہوئی۔ ملاقات کے دوران وزیراعلیٰ پنجاب عثمان بزدار کا کہنا تھا کہ تنقید برائے تنقید کے باوجود پنجاب حکومت کی کارکردگی تینوں صوبوں سے بہتر ہے۔ سازشی عناصر تنقید کرتے رہ جائیں گے اور پنجاب آگے بڑھتا جائے گا۔
ملاقات میں ارکان قومی اسمبلی اور حکومت کے درمیان کوآرڈینیشن کو مزید بہتر بنانے کا فیصلہ کیا گیا۔ وزیراعلیٰ کا کہنا تھا کہ ارکان قومی اسمبلی کے حلقوں کے مسائل حل کئے جائیں گے۔ کسی کو منتخب نمائندوں کے جائز کام میں آڑے نہیں آنے دیا جائے گا۔ وزیراعلیٰ آفس کے دروازے کھلے ہیں۔ ارکان قومی اسمبلی بھی اسی طرح عزیز ہیں، جس طرح ارکان پنجاب اسمبلی۔ عوام کے مسائل کے حل کے لئے مشاورت کا سلسلہ جاری رکھوں گا۔ صوبے کے عوام کی خدمت کے سفر میں شانہ بشانہ چلیں گے۔
