دیر. امیر جماعت اسلامی پاکستان سینیٹر سراج الحق نے کہا ہے کہ ملک کودرپیش خطرات کے پیش نظر جماعت اسلامی اور قبائل پاک فوج کے شانہ بشانہ کھڑے ہیں،انضمام کا مقصد قبائلی عوام کو ریلیف دینا تھا لیکن حکومت اپنے کیے گئے وعدوں سے مکر گئی اور قبائلی عوام کو گوناگوں مسائل سے دوچار کرلیا ۔
باجوڑ میں قبائلی عمائدین سے خطاب کرتے ہوئے سینیٹر سراج الحق نے کہا کہ ہندوستان کی جارحیت کے خلاف قبائلی عوام کا پاک فوج اور ملک کی سالمیت کیلئے جذبہ قابل دید تھا،ہندوستان کے جانب سے کشمیر میں کئی دہائیوں سے جاری بربریت دنیا پر عیاں ہوچکی ہے، اب ان کی جانب سے حملہ اور حملے کے نتیجے میں پاک فضائیہ کی جانب سے دندان شکن جواب نے انہیں ذلت و رسوائی کا تماشہ بنادیا ۔
امیر جماعت اسلامی پاکستان کا مزید کہنا تھا کہ قبائلی عوام کو انضمام کے ثمرات نہیں مل سکے کیونکہ موجودہ حکومت اپنے کیے گئے وعدوں سے مکر گئی ہے اور انضمام کو قبائلی عوام کیلئے وبال جان بنا دیا گیا ہے،سابقہ تمام ادارے ٹھپ ہوکر رہ گئے ہیں جبکہ صوبائی حکومت قبائلی عوام کو سینے سے لگانے سے گریزاں ہے،ہم حکومت سے مطالبہ کرتے ہیں کہ قبائلی اضلاع کی ترقی پر مکمل ترجیح دے اور ترجیحی بنیادوں پر قبائلی اضلاع میں تعلیم ، صحت اور دیگر شعبوں میں کام کرے۔ انہوں نے قبائلی عمائدین کو مخاطب کرتے ہوئے کہ ہماری جماعت کا اصل منشور ملک میں اسلامی نظام کا نفاذ ہے،آپ سب اپنی قوم کے مشیران ہیں،آپ اپنی ذمہ داریوں کا احساس کرتے ہوئے جماعت اسلامی کے اسلامی اور فلاحی پاکستان میں اپنا کردار ادا کریں,جماعت اسلامی ملک میں اسلامی نظام کے قیام کیلئے کوشاں ہے،قبائل ملک میں مکمل اسلامی نظام کے قیام کیلئے جماعت اسلامی کا ساتھ دیں.
