عام انتخابات میں مبینہ دھاندلی کی تحقیقات کیلیے 30 رکنی پارلیمانی کمیٹی تشکیل

اسلام آباد: عام انتخابات 2018 میں مبینہ دھاندلی کی تحقیقات کے لئے 30 رکنی پارلیمانی کمیٹی تشکیل دے دی گئی ہے۔ ایکسپریس نیوزکے مطابق عام انتخابات 2018 میں مبینہ دھاندلی کی تحقیقات کے لئے پارلیمانی کمیٹی تشکیل دے دی گئی ہے، 30 رکنی پارلیمانی کمیٹی میں 10 ارکان سینیٹ اور20 قومی اسمبلی سے لیے گئے ہیں۔ پارلیمانی کمیٹی میں اپوزیشن اور حکومتی ارکان کو برابر نمائندگی دی گئی ہے، مسلم لیگ (ن) کی جانب سے احسن اقبال، رانا ثناء اللہ ، رانا تنویر اور مرتضی جاوید عباسی پارلیمانی کمیٹی کا حصہ ہیں، دیگر ارکان میں اعظم سواتی، بیرسٹرفروغ نسیم، بیرسٹر سیف، خوش بخت شجاعت، نعمان وزیر، خورشید شاہ، راجہ پرویز اشرف، نوید قمر، رضا ربانی، رحمان ملک، عثمان کاکڑ اور سینیٹر کلثوم پروین شامل ہیں جب کہ سردار اختر مینگل اور جمعیت علمائے اسلام کے مولانا عبدالواسع بھی کمیٹی کا حصہ ہوں گے۔ واضح رہے کہ مسلم لیگ (ن) سمیت تمام اپوزیشن جماعتوں نے عام انتخابات میں دھاندلی کے الزامات عائد کرتے ہوئے تحقیقات کے لیے پارلیمانی کمیشن بنانے کا مطالبہ کیا تھا جس پر 18 ستمبر کو وزیر خارجہ اور تحریک انصاف کے وائس چیئرمین شاہ محمود قریشی نے مبینہ دھاندلی کی تحقیقات کے لیے خصوصی پارلیمانی کمیٹی کے قیام کی تحریک پیش کی جسے ایوان نے متفقہ طور پر منظور کرلیا تھا۔