چوہدری پرویز الہٰی پنجاب اسمبلی کے اسپیکر منتخب

لاہور: مسلم لیگ (ق) کے چوہدری پرویز الہیٰ پنجاب اسمبلی کے نئے اسپیکر منتخب ہوگئے ہیں۔ پنجاب اسمبلی کا اجلاس رانا محمد اقبال کی سربراہی میں ہوا۔ اجلاس میں پہلے اسپیکر کا انتخاب عمل میں آیا۔ اسپیکر پنجاب اسمبلی کےعہدے کے لیے پاکستان تحریک انصاف اوران کے اتحادیوں کی جانب سے چوہدری پرویز الٰہی اور مسلم لیگ (ن) کی جانب سے چوہدری محمد اقبال امیدوار تھے۔ رائے شماری کے دوران کئی مرتبہ مسلم لیگ (ن) کے ارکان کی جانب سے نعرے بازی کی گئی، رائے شماری مکمل ہونے کے بعد ووٹوں کی گنتی کا عمل ہوا جس میں چوہدری پرویز الہی کامیاب قرار پائے۔ اسپیکر کے انتخاب میں 349 ووٹ کاسٹ کیے گئے، پرویز الہیٰ نے 201 اور چوہدری اقبال نے 147 ووٹ حاصل کئے جب کہ ایک ووٹ مسترد ہوا۔ اسپیکر کی کامیابی کا اعلان ہوتے ہی ایوان میں ایک مرتبہ پھر ہنگامہ آرائی شروع ہوئی، مسلم لیگ (ن) کے ارکان نے اسپیکر ڈائس کے سامنے نعرے بازی کی جس کے جواب میں تحریک انصاف کے ارکان بھی نعرے لگاتے رہے، ہنگامہ آرائی اور نعرے بازی ہی میں چوہدری پرویز الہٰی نے حلف اٹھایا۔ واضح رہے کہ 371 ارکان پر مشتمل پنجاب اسمبلی میں 360 ارکان منتخب ہو کر ایوان میں پہنچے ہیں جبکہ 11 نشستیں تاحال خالی ہیں۔ 177 کا تعلق پاکستان تحریک انصاف اور 162 کا مسلم لیگ (ن)، 10 کا تعلق مسلم لیگ (ق)، 7 کا پیپلز پارٹی اور ایک رکن کا تعلق راہِ حق پارٹی سے ہے جب کہ 3 آزاد رکن ہیں۔