چوک اعظم۔ ٹریفک پولیس نے روکنے کی کوشش کی تو ڈرائیور نے ٹرالر اوپر چڑھا دیا

چوک اعظم( صبح پا کستان) ۔ٹرالر بیرئیر توڑتا ہوا شہر میں داخل ،ٹریفک پولیس کے روکنے پر گاڑی چڑھا دی ،شہریوں نے موٹر سائیکل اور گاڑیاں پیچھے لگا کر میانوالی روڈ بائی پاس پر روک لیا ۔مقدمہ درج کر لیا گیا ۔تفصیل کے مطابق گزشتہ روز کراچی سے وزیرستان جانے والاٹرالر ملتان روڈ پر ٹریفک پولیس کے لگے بیرئیر کو توڑتا ہوا تیز رفتاری سے شہر میں داخل ہو گیا ۔ٹریفک پولیس نے روکنے کی کوشش کی تو ڈرائیور نے ٹرالر اوپر چڑھا دیا جس سے پولیس اہل کا ر بال بال بچ گئے ۔بعد ازاں شہریوں نے غیر معمولی رفتار سے شہر میں داخل ہوتے ہوئے ٹرالر کو دیکھا تو انہوں نے موٹر سائیکل اور کاریں پیچھے لگا دیں اور ٹرالر کو میانوالی روڈ والے بائی پاس سے آگے جا کر روک لیا ۔اسی اثناء میں ٹریفک پولیس کے انچارج عبدالرزاق ،اعجاز سندھو ،مقبول احمد اور ایلیٹ فورس کے اہل کا ر گئے جنہوں نے ٹرالر اور ا سکے عملہ کے خلاف کاروائی کرتے ہوئے ان کے خلاف مقدمہ درج کر کے گاڑی سمیت ملزمان کو حوالات میں بند کر دیا ۔