راجن پور( صبح پاکستان )ضلع کونسل راجن پور کا اجلاس زیر صدارت وائس چیئرمین مرزا شہزاد ہمایوں کے منعقد ہوا ۔اجلاس میں ضلعی چیئر مین کے علاوہ ضلع بھر کے یونین کونسلز کے چیئرمینوں اور ممبران نے شرکت کی۔اجلاس میں ضلعی چیئرمین سردار عبدالعزیز خان دریشک نے خطاب کرتے ہوئے کہا کہ انشاء اللہ بہت جلد ضلع کی محرومیوں کو ختم کریں گے اور ضلع میں خوشحالی لائیں گے ۔ انہوں نے کہا کہ غریب طبقہ کے لوگوں کے لئے روزگار کے مواقع فراہم کریں گے اور کسانوں کی خوشحالی کے لئے حکومت پنجاب اربوں روپے کی سبسڈی دے رہی ہے ۔ہماری کوشش ہے کہ ضلع کی ترقی میں سب کو ساتھ لے کر چلیں گے۔ انہوں نے کہا کہ یونین کونسل کے چیئر مین بارہ لاکھ تک کے اپنی یوسیز میں ترقیاتی سکیموں پر کام کروا سکتے ہیں۔اس موقع پر مختلف یوسیز کے چیئرمینوں نے اپنی اپنی تجاویز پیش کیں ۔آخر میں علاقے کی ترقی اورملکی خوشحالی کے لئے دعا کی گئی۔قبل ازیں اجلاس کا آغاز تلاوت کلام پاک اور نعت رسول مقبول ﷺ سے ہوا۔
