ڈیرہ غازیخان(صبح پا کستان).کمشنر ڈیرہ غازیخان محمد یثرب نے ڈویژن میں قائم اشیائے خوردونوش تیار کرنے والی گھریلو و کمرشل انڈسٹریز کی تفصیلات طلب کر لی ہیں . مضر صحت اور ملاوٹی اشیاء برآمد ہونے پر کاروباری مراکز سربمہر ،فروخت اور تیار کنندگان کی گرفتاریاں عمل میں لانے کے احکامات جاری کر دیئے گئے ہیں . انہوں نے یہ احکامات اس سلسلے میں منعقدہ جائزہ اجلاس کی صدارت کرتے ہوئے جاری کیے. کمشنر محمد یثرب نے کہاکہ ٹاسک فورس دودھ ، گوشت ، نمکو ، مٹھائی ، مصالحے ، مرچ اور دیگر اشیائے خوردونوش کے معائنہ کے دوران اچھی طرح چھان بین کرے . نمونوں کی محفوظ ترسیل کے ساتھ لیبارٹری سے بروقت رپورٹ کے حصول کیلئے باقاعدہ رابطہ رکھا جائے . ناقص صفائی اور مضر صحت اشیاء کی تیاری پر فیکٹری ، دکان اور دیگر کاروباری مراکز سیل اورموثر کارروائی کیلئے ٹھوس دفعات لگا کر مقدمات درج کیے جائیں . مقدمات کے ساتھ ملوث افراد کی گرفتاری عمل میں ضرور لائی جائے. کمشنر نے کہاکہ انسانی صحت کے ساتھ کھیلنے والوں کو نشان عبرت بنا دیا جائے گا . ضرورت اس امر کی ہے کہ متعلقہ محکمے قریبی رابطہ رکھیں . عوام میں مہم کی افادیت کے بارے میں شعور اجاگر کرنے کیلئے میڈیا کا تعاون حاصل کیا جائے. چھاپوں کی ویڈیو ریکارڈنگ محفوظ کی جائے . کمشنر محمد یثرب نے کہاکہ حکومت کے پنجاب انفارمیشن ٹیکنالوجی بورڈ کی ویب سائیٹ پر درست اعداد و شمار کی فراہمی یقینی بنائی جائے . ایڈیشنل کمشنر کوآرڈینیشن اظفر ضیاء نے چاروں اضلاع کی کارکردگی سے متعلق بریفنگ دیتے ہوئے کہاکہ اکتوبر اور نومبر کے دوران ڈویژن بھر میں مضر صحت اشیاء کی تیاری اور فروخت میں ملوث افراد کے خلاف 103مقدمات درج کر کے 49ملزموں کو گرفتار کیاگیا. 52کاروباری مراکز سربمہر اور 724400روپے جرمانہ کیاگیا. 3359معائنوں کے دوران اشیائے خوردونوش کے 1892نمونے لے کر تجزیہ کیلئے لیبارٹری بھجوائے گئے . مجموعی طو رپر 78087 مضر صحت اشیاء ضبط کی گئیں. کمشنر محمد یثرب نے مقدمات کی تعداد کے مطابق کم گرفتاریاں عمل میں لانے پر عدم اطمینان کا اظہارکیا . انہوں نے کہاکہ فوڈ انسپکٹرز اور متعلقہ محکمے باقاعدہ اہداف مقرر کریں تاکہ مکروہ دھندہ میں ملوث افراد کو بے نقاب کرنے کے ساتھ ساتھ عبرتناک سزا دی جاسکے . اجلاس میں متعلقہ افسران شریک تھے .