راجن پور( صبح پا کستان )پاکستان کو ایک خوشحال اور ترقی یافتہ ملک بنانے کے لئے ضروری ہے کہ خواتین کی معاشی حالت کو بہتر بنایا جائے ۔انہیں مالی وسائل فراہم کئے جائیں ۔حکومت پنجاب نے خواتین کے حقوق اور ترقی کے لئے ادارے بنائے ہیں اور واراثت میں بھی عورت کو خود با خود ان کا حق مل رہا ہے ۔جو بچیاں زیر تعلیم ہیں ان کا وظیفہ بھی بڑھا دیا گیا ہے ۔ان خیالات کا اظہار ڈپٹی کمشنر راجن پور اشفاق احمد نے خواتین کے عالمی دن کے حوالے سے منعقدہ ایک تقریب سے خطاب کرتے ہوئے کیا ۔اس موقع پر ضلعی چیئرمین سردار عبدالعزیز خان نے خطاب کرتے ہوئے کہا کہ اسلام سے پہلے عورت ستم ذدہ تھی اور ان کو زندہ دفن کر دیا جاتا تھا ۔آج عورت کو جو عزت ملی ہے وہ اسلام کی وجہ سے ہے ۔موجودہ حکومت بھی خواتین کے حقوق کے لئے اہم اقدامات کر رہی ہے ۔انہوں نے کہا کہ ایسے سیمینار ضلع کے دیہی علاقوں میں بھی کرائے جائیں تاکہ لوگوں کو عورتوں کے حقوق سجھنے میں شعور اجاگر ہو ۔اس تقریب کے دوران ڈپٹی ڈائریکٹر سوشل ویلفیئر شازیہ نواز ،نادیہ نواز،تہمینہ دلشاد،عمیر عثمانی ایڈوکیٹ ،مولانا جلیل الرحمان ،ابراہیم ،سلیم شیخ اور خواتین نے بھی اپنے اپنے خیالات کا ظہار کرتے ہوئے کہا کہ خواتین کے لئے بہتر سے بہتر پالیسیاں بنائی جائیں تاکہ وہ اپنے حقوق با آسانی حاصل کر سکیں۔معاشرے میں عورت کو کمزور سمجھ کر ان کو حقوق سے محروم کر دیا جاتا ہے ۔خواتین کو چاہئے کہ وہ اپنے حقوق کے لئے جرات پیدا کریں ۔آج خواتین کے عالمی دن کے حوالے سے یہ تقریب محکمہ سوشل ویلفیئر کے زیر اہتمام ہوئی ۔اس تقریب کا آغاز تلاوت کلام پاک اور نعت رسول مقبول ﷺ سے ہوا اور مختلف سکولوں کے بچوں نے ثقافتی اور روائتی خاکے پیش کئے ۔اس تقریب میں اے ڈی سی جی افضل ناصر ،اے ڈی سی ریوینو طارق نیازی ،اے سی راجن پور شاہد محبوب ،ڈی ایم او راشد نعمت ،اے سی روجھان عمران منیر کے علاوہ خواتین کی کثیر تعداد نے شرکت کی۔اس تقریب کے سٹیج سیکریٹری کے فرائض غلام حسین شاہین نے سر انجام دئے۔