ڈیرہ غازیخان(صبح پا کستان ).ٹیچنگ ہسپتال ڈیرہ غازیخان میں انڈور صفائی کے معاملات 20لاکھ روپے ماہانہ ٹھیکہ پر دے دیئے گئے اور کمپنی نے انتظامات سنبھال لیے. ٹیچنگ ہسپتال میں ایمرجنسی ، ٹراما سنٹر اورداخل مریضوں کیلئے مفت ادویات اور ٹیسٹ کی سہولیات پر عملدرآمد کرایاجائے گا . سرکاری ہسپتالوں میں میڈیکل ریپ اور اشیائے خوردونوش بیچنے والوں کے داخلے پر پابندی عائد کر دی گئی ہے . ڈاکٹرز او رپیرا میڈیکل سٹاف کی بروقت حاضری اور یونیفارم کی پابندی پر عملدرآمد کرایا جائے گا. یہ بات کمشنر ڈیرہ غازیخان ڈویژن محمد یثرب کے ہسپتال معائنہ اور اجلاس میں دوران بریفنگ بتائی گئی . کمشنر محمد یثرب نے کہاکہ ایمرجنسی اور ٹراما سنٹرکے سامنے کسی بھی قسم کی پارکنگ نہیں ہونی چاہیئے. سی سی ٹی وی کیمروں کی کڑی نگرانی سمیت سکیورٹی کے بہتر انتظامات کیے جائیں . ایمرجنسی ، ٹراما سنٹر اورانڈور مریضوں کیلئے باہر سے ادویات اور ٹیسٹ تجویز کرنے وا لوں کے خلاف کارروائی عمل میں لائی جائے گی. بلڈ بنک کے ڈونرز کے رابطہ نمبرزاورمتعلقہ ریکارڈ چیک کیا جائے. خراب مشینری اور آلات فوری فنکشنل کیے جائیں . تعطیلات کے روز بھی فارماسسٹ کی موجودگی کو یقینی بنایا جائے. ہسپتال میں مسلسل بجلی کی فراہمی کیلئے دو علیحدہ فیڈرز کی تنصیب ،جنریٹرز کو فنکشنل کرنے ، واپڈا اور ہسپتال کے �آلات کی مرمت کے حوالے سے ایڈیشنل ڈپٹی کمشنر فنانس و پلاننگ تین روز کے اندر رپورٹ پیش کریں . ہسپتال کے داخلی گیٹ پر وارڈز اور دیگر شعبوں کی رہنمائی کیلئے سائن بورڈ نصب کیے جائیں .
ادویات کی لوکل پرچیز کیلئے متعلقہ میڈیکل سٹور ہفتے کےساتوں دن 24گھنٹے کیلئے کھلا رہنا چاہیئے . کمشنر محمد یثرب نے ایمرجنسی وارڈ کے معائنہ کے دورا ن لواحق کی طرف سے باہر سے ٹیسٹ کرانے اور بلڈبنک کیبنٹ خراب ہونے کی نشاندہی پر برہمی کا اظہار کرتے ہوئے ایم ایس کو فوری طو رپر معاملے کا نوٹس لینے اور کارروائی کر کے رپورٹ پیش کرنے کی ہدایات جاری کیں . کمشنر محمد یثرب نے ایمرجنسی کے مختلف شعبوں کا تفصیلی جائزہ لیااور ضروری احکامات جاری کیے . کمشنر نے محکمہ بلڈنگز کو ہدایت کی کہ وہ ہسپتال کی تعمیر ومرمت کا تفصیلی سروے و تخمینہ لگا کر پیش کریں تاکہ دو روز کے اندر اجلاس میں منصوبے کی منظوری دی جاسکے. کمشنر محمد یثرب کو بتایاگیا کہ ٹیچنگ ہسپتال کے مسنگ سپیشلیٹیز کے 350بسترکے آٹھ گروپس کی تعمیر دسمبر 2017تک مکمل کی جائے گی اور تمام گروپس میں سنٹرلی ہیٹ ، وینٹی لیشن اور ایئر کنڈیشنڈ سسٹم نصب ہو گا . سکیم کیلئے مکمل فنڈز فراہم کر دیئے گئے ہیں . ڈپٹی کمشنر ڈیرہ غازیخان ندیم الرحمن نے بتایا کہ ہسپتال کے معاملات بہتر کرنے کیلئے 15اعلی افسران کی ڈیوٹیاں لگائی گئیں. زراعت اور فاریسٹ محکموں کے تعاون سے ہسپتال کے لانز کو کافی حد تک بہتر کر لیا گیا ہے. فلٹریشن پلانٹ تین روز کے اندر بحال کرا لیا جائے گا. کمشنر محمد یثرب نے کہاکہ طب مسیحائی پیشہ ہے ڈاکٹرزاو رپیرامیڈیکل سٹاف مکمل ڈیوٹی دینے کے ساتھ 20فیصد اضافی فرائض انجام دے کر ثواب بھی حاصل کرے . انہوں نے کہاکہ ٹیچنگ ہسپتال ڈیرہ غازیخان میں بلوچستان ، سندھ اور دیگر صوبوں سے مریضوں کا دباؤ ہے ضرورت اس امر کی ہے کہ غریب عوام کو مفت علاج معالجہ کی بہترین سہولیات دے کر توقعات پر پورا اترا جائے .
کمشنر محمد یثرب نے ایم ایس آفس میں گزشتہ ہونے والے اجلاس میں دی گئی ذمہ داریوں اور احکامات کاتفصیلی جائزہ لیا . اس موقع پر ایڈیشنل کمشنر کوآرڈینیشن اظفر ضیاء ، پرنسپل میڈیکل کالج پروفیسر شاہ زمان ،چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر منور عباس ، ایڈیشنل ڈپٹی کمشنر فنانس و پلاننگ سرفراز مگسی ، ایم ایس ڈاکٹر موسی کلیم ، ڈپٹی ایم ایس ڈاکٹر خالد تحسین ، ڈاکٹر ملک محمد قاسم ، ایکسیئن واپڈا فرقان زکریا ، وائس پرنسپل ڈاکٹر تحسین اقبال ، چیف آفیسر میونسپل کارپوریشن خالد محمو د قمر ، ڈی او زراعت توسیع جمیل احمد ، ایس ڈی او بلڈنگز اصغر علی ، ڈاکٹر حسنین ارشاد نوحی او ردیگر متعلقہ افسران موجود تھے.
