لیہ(صبح پا کستان)وفاقی پارلیمانی سیکرٹری سید ثقلین شاہ بخاری نے دھول نگر میں سوئی گیس فراہمی منصوبے کا افتتاح کرد یا ۔ سوئی گیس افتتاحی جلسے سے خطاب کرتے ہوئے ایم این اے سید ثقلین شاہ بخاری نے کہا کہ دیگر اضلاع کی نسبت ضلع لیہ میں تسلسل کے ساتھ ترقیاتی منصوبے جاری ہیں، سوئی گیس فراہمی میاں برادران کے عوام سے کئے گئے وعدوں کی تکمیل کا مظہر ہے، ممبر قومی اسمبلی نے دھول نگر سمیت لیہ میں سیوریج منصوبوں کے لئے جلد مربوط پلان بنانے کا وعدہ کرتے ہوئے کہاکہ لیہ چوک اعظم دورویہ سڑک بھی جلد مکمل کر لی جائے گی اور لیہ تونسہ پل بھی مسلم لیگ ن کے دور میں بنے گا جس کا افتتاح وزیر اعظم پاکستان میاں محمد نواز شریف اپنے دورہ لیہ کے دوران کر یں گے۔اس موقع پر خطاب کرتے ہوئے صدر انجمن تاجران وممبر میونسپل کمیٹی ملک مظفر دھول نے کہا کہ ایم این اے نے سوئی گیس فراہمی منصوبے کی تکمیل کر کے مکینوں کے د ل جیت لئے ہیں، حلقہ کی تعمیر و ترقی کے لئے ممبر قومی اسمبلی کی کاوشیں و کوششیں قابل تعریف ہیں، اس موقع پر جنر ل سیکرٹری انجمن تاجران شیخ کمال الدین ، چیئر مین یوسی کوٹلہ حاجی شاہ ملک نصیر بھٹہ، کونسلر ملک ریاض لیڈر سمیت دھول نگر کے مکینوں کی بڑی تعداد موجود تھی ۔
