ڈیرہ غازیخان(صبح پا کستان)سول سروسز اکیڈمی 44ویں کامن کے زیر تربیت 18افسران تین روزہ دورے پر ڈیرہ غازیخان پہنچ گئے ہیں . انہوں نے ضلع ڈیرہ غازیخان کے ترقیاتی منصوبوں ، تعلیمی اداروں اور مراکز صحت کا معائنہ کیا. کمشنر اللہ رکھا انجم سے ان کے دفتر میں ملاقات کی . اس موقع پر بات چیت کرتے ہوئے کمشنر نے کہاکہ ڈیرہ غازیخان ڈویژن کو ملک بالخصوص صوبہ میں منفرد حیثیت حاصل ہے . ڈویژنل ہیڈکوارٹر ڈیرہ غازیخان ملک کے سنگم پر واقع ہے جہاں چاروں صوبوں کو راستہ جاتاہے. ڈیرہ غازیخان اور راجن پور اضلاع کے کوہ سلیمان کے پہاڑی سلسلوں میں معدنیات کے وسیع ذخائر موجود ہیں . دونوں اضلاع کی قبائلی فورس بی ایم پی ،بلوچ لیوی کوبھی منفرد شناخت حاصل ہے . کمشنر اللہ رکھا انجم نے بتایا کہ حکومت پنجاب علاقہ کی تعمیر و ترقی پر خصوصی توجہ دے رہی ہے . مالی سال 2016-17کے تحت 1761میگا پراجیکٹس پر 40ارب روپے سے زائد رقم خرچ کی جا رہی ہے . ڈویژن کے 3070مواضعات میں سے 2548کا ریکارڈ کمپیوٹرائزڈ کر کے آن لائن کر دیاگیا ہے . قائمقام ڈی پی او چودھری سجاد حسین گجر نے آر پی او کی نمائندگی کرتے ہوئے بتایا کہ ڈویژن بھر میں دیوبندی کی 731، اہل تشیع کی 48، بریلوی کے 860اور اہلحدیث کے 48مدارس کے علاوہ 37چرچ ، قادیانی فرقہ کی 41عبادت گاہیں اور ایک مندر موجود ہے . اس موقع پر ٹرینی افسران کی طر ف سے کمشنر اللہ رکھا انجم اور قائمقام ڈی پی او چودھری سجاد حسین گجر کو یادگاری شیلڈز دی گئیں . تقریب میں ایڈیشنل کمشنر کوآرڈینیشن اظفر ضیا ء، اسسٹنٹ ڈائریکٹر پلاننگ انعم حفیظ ، اے سی جی محمد اسد ، اے سی آر سیف الرحمن ، اسسٹنٹ کمشنر اصغر مجید بلوچ ، چیف ایگزیکٹو آفیسر ز ڈاکٹر منورعباس ، عبدالغفار لنگاہ ، اے ڈی آئی جی طاہر مصطفی کے علاوہ وقاص الیاس کی زیر قیادت آنے والے ٹرینی افسران زین العابدین ، ساجد خان ، عمارہ رفیق ، مریم خان ، منور حسین ، سرفراز احمد ، محمد اطہر ، احمد رضوان ، حمید خان اور دیگر موجود تھے .
