عشرہ محرم الحرام کے مقدس ایا م کے دوران عزاداری کے جلو سوں و مجا لس عزاء کی فول پروف سیکورٹی کو یقینی بنایا جائے ، کمشنر ڈیرہ غازیخان
لیہ (صبح پا کستان)کمشنر ڈی جی خان ڈویثرن محمد یثرب نے کہا ہے کہ عشرہ محرم الحرام کے مقدس ایا م کے دوران عزاداری کے جلو سوں و مجا لس عزاء کی فول پروف سیکورٹی کو یقینی بنایا جائے گا اور سیکورٹی پلان پر عمل درآمد کے لیے تمام ممکنہ وسائل بروئے کار لاتے ہوئے امن دشمن اور شر پسندعناصر سے آہنی ہاتھوں سے نمٹا جائے گا اور ایس او پی کے مطا بق تمام ضروری میو نسپل سروسز کی فراہمی کے لئے کو ئی دقیقہ فرو گزاشت نہ کیا جا ئے گا ۔ یہ با ت انہو ں نے ٹی ایم اے ہال لیہ میں ضلعی امن کمیٹی کے اجلاس کی صدارت کرتے ہوئے کہی۔اس موقع پر ریجنل پولیس آفیسر رحمت اللہ نیازی،ممبران اسمبلی سید ثقلین شاہ بخاری ، چوہدری اشفاق احمد ، ڈی سی او سید واجد علی شاہ،ڈی پی او کیپٹن (ر)محمد علی ضیاء ، سرکا ری افسران و ممبران ڈسٹرکٹ امن کمیٹی موجود تھے ۔اجلاس میں ڈی سی او سید واجد علی شاہ نے ملٹی میڈیا کے ذریعے بریفنگ کے دوران ضلع لیہ میں 1778 مجالس عزا ،133عزاء داری کے جلوسوں کو فول پروف سیکورٹی ،موثر میونسپل سروسز ،روشنی کے متبادل انتظامات ،تجاوزات کے خاتمے،روٹس کی ضروری تعمیر و مرمت ،24حساس مقامات پر خصوصی سیکورٹی ،ضلع کے 7 پتنوں پر تین دریائی پوسٹوں کے ذریعے خصوصی گشت وپڑتال اور محرم الحرام انتظامات کے سلسلہ میں اٹھائے گئے اقدامات کے بارے میں تفصیلی بریفنیگ دی ۔کمشنر ڈی جی خان نے کہا کہ محرم الحرام کے دوران حقیقی امن کے حصول کے لئے اخوت، بھائی چارئے ،ملی جذبے،صبروتحمل اور مذہبی رواداری کی فضاء کو پروان چڑھاتے ہوئے باہمی رابطے اور تعاون کے ذریعے امن وامان کے قیام کو یقینی بنانے کے لیے اپنا بھر پور اور موثرکردار ادا کرنا ہوگا۔اجلاس سے آر پی او رحمت اللہ نیازی نے کہا کہ ڈویثرن بھر میں ضلع لیہ امن وامان کے قیام کے حوالے سے مثالی ضلع کی حثیت رکھتا ہے جس کے لیے انتظامی افسران و اراکین امن کمیٹی خراج تحسین کی مستحق ہیں۔اجلاس سے خطاب کرتے ہوئے ممبران اسمبلی سید ثقلین شاہ بخاری اور چوہدری اشفاق احمدو سابق صوبائی وزیر ملک احمد علی اولکھ نے کہا کہ وزیر اعلی پنجاب کی امن وامان کے قیام کے لیے واضح ہدایات کی روشنی میں صوبے بھر میں امن کمیٹیوں و ضلعی انتظامیہ کے اجلاسز کے ذریعے مشترکہ لائحہ عمل تیار کرتے ہوئے امن و امان کے قیام کو یقینی بنانے او ر شرپسند عناصر کے قلع قمع کے لیے فول پروف سیکورٹی پلان مرتب کیے جارہے ہیں ۔اجلاس میں اراکین ڈسٹرکٹ امن کمیٹی طلحہ زبیر ،سید ثقلین زید ی ،سید نئیر عباس شاہ،قاری کفایت اللہ ،قاری فداالرحمان ،قاری عمر حیات ،سید علم دارحسین شاہ،رانا اعجاز سہیل،محمد اشرف چشتی،صدر انجمن تاجران لیہ واحد بخش باروی ،کروڑ حاجی مختیار حسین نے خطاب کرتے ہوئے مختلف امور کے بارے میں توجہ مبذول کروانے اور امن وامان کے لیے ضلعی انتظامیہ سے اپنے بھر پور تعاون کا یقین دلایا۔بعدازاں قاری کفایت اللہ نے ملکی سلامتی استحکام کے لیے دعاکرائی۔
