First Page

لیہ( صبح پا کستان ) ڈپٹی کمشنر لیہ آصف علی ڈوگر نے میڈیا نمائندگان کے ہمراہ ڈی ایچ کیو ہسپتال لیہ میں قائم نگہبان دسترخوان پر روزہ افطار کیا۔ اس موقع پر ایڈیشنل ڈپٹی کمشنر جنرل شبیر احمد ڈوگر، جی ایم شوگر ملز بشیر حیدر،سابق صدر پریس کلب عبدالرحمن فریدی اور دیگر متعلقہ افسران بھی موجود تھے۔ڈپٹی کمشنر نے نگہبان دسترخوان کے انتظامات کا جائزہ لیا۔انہوں نے اس موقع پر میڈیا نمائندگان سے گفتگو کرتے ہوئے کہا کہ وزیر اعلی پنجاب مریم نواز شریف کی ہدایت پر صوبہ بھر میں نگہبان دسترخوان کا قیام عمل میں لایا گیا ہے تاکہ ماہ مقدس رمضان المبارک میں مستحق افراد کو باعزت انداز میں افطاری فراہم کی جا سکے۔ڈپٹی کمشنر نے کہا کہ وزیر اعلی پنجاب کا خصوصی فوکس خواتین کی فلاح و بہبود اور ان کے وقار کے تحفظ پر ہے اسی تناظر میں نگہبان دسترخوان میں خواتین کے لئے علیحدہ اور باپردہ انتظامات کئے گئے ہیں تاکہ وہ مکمل عزت اور اطمینان کے ساتھ روزہ افطار کر سکیں۔ انہوں نے کہا کہ خواتین کے لئے الگ جگہ مختص کی گئی ہے جہاں وہ پردے کے مناسب انتظام کے ساتھ افطاری کر رہی ہیں،م جو حکومت پنجاب کے ویژن کی عکاسی کرتا ہے۔ڈپٹی کمشنر نے کہا کہ ضلعی انتظامیہ وزیر اعلی پنجاب کے وژن کے مطابق عوام کو زیادہ سے زیادہ ریلیف فراہم کرنے کے لئے متحرک ہے اور نگہبان دسترخوان اسی سلسلہ کی ایک کڑی ہے۔ انہوں نے کہا کہ حکومت پنجاب کی ہدایات کے مطابق شفافیت اور معیار کو یقینی بنایا جا رہا ہے تاکہ حقیقی مستحقین اس سہولت سے مستفید ہو سکیں۔ڈپٹی کمشنر آصف علی ڈوگر نے نگہبان دسترخوان کے انعقاد میں تعاون پر تھل انڈسٹری شوگر ملز کا شکریہ ادا کیا اور کہا کہ نجی شعبہ کا تعاون قابل تحسین ہے جس کی بدولت مستحق افراد کی بہتر انداز میں خدمت ممکن ہو رہی ہے۔ڈپٹی کمشنر نے اپنے پیغام میں مخیر حضرات سے کہا کہ وہ اس کار خیر میں بڑھ چڑھ کر حصہ لیں تاکہ زیادہ سے زیادہ لوگوں تک سہولت پہنچائی جا سکے۔