مظفر گڑھ . علی پور میں 7 بچوں اور اہلیہ کو قتل کرنے والے سجاد کھوکھر نامی شخص کو آلہ قتل سمیت گرفتار کر لیا گیا ہے اور اب ملزم نے دوران تفتیش قتل کی وجہ بتا دی ہے۔
علی پور کے علاقے مڈوالا میں سجاد کھوکھر نامی والد نے اپنے 7 بچوں کو موت کی نیند سلا دیا تھا جبکہ اہلیہ کو بھی قتل کر دیا، جس کے بعد پولیس نے موقع پر سے ملزم کو گرفتار کر لیا تھا۔پولیس کی جانب سے دوران تفتیش ملزم نے بتایا کہ اس نے گھریلو ناچاقی کی بنا پر بچوں اور اہلیہ کو قتل کیا ہے۔
دوسری جانب ڈی پی او کے مطابق ملزم کی ذہنی صحت بالکل ٹھیک ہے، ابتدائی تحقیقات میں قتل کی وجہ بھی گھریلو ناچاقی سامنے آئی ہے جبکہ بیوی کے روز آئے روز جھگڑے ہوتے رہتے تھے۔
مظفرگڑھ کی تحصیل علی پور میں قتل کیےگئے8 افراد کی نماز جنازہ ادا کرد گئی، جس کے بعد تدفین آبائی علاقے مڈ والا میں کی گئی، نماز جنازہ میں اہل علاقہ سمیت سیاسی و سماجی شخصیات کی بڑی تعداد نے شرکت کی جبکہ واقعے کا مقدمہ پولیس کی مدعیت میں درج کرلیا گیا۔
بے رحم باپ کے ہاتھوں قتل ہونے والے 8 افراد کی نماز جنازہ
علی پور کے علاقے مڈوالا میں بے رحم باپ کے ہاتھوں قتل ہونے والے 8 افراد کی نماز جنازہ مڈوالا میں ادا کر دی گئی۔ جب جنازے اٹھے تو ہر آنکھ اشکبار اور ہر دل افسردہ تھا،
نمازجنازہ میں لیگی ایم پی اے رانا عبدالمنان ساجد، سجادہ نشین درگاہ عالیہ کوٹمٹھن شریف عامر کوریجہ، سابق ایم پی اے شہزاد رسول، مقامی انتظامیہ، پولیس اہلکاروں سمیت اہل علاقہ نے کثیر تعداد میں شرکت کی۔
جنازے کی ادائیگی کے بعد مرنے والے افراد کی تدفین مقامی قبرستان میں کردی گئی، ماں اور 7 بچوں کو ایک دوسرے کے پہلو میں دفن کیا گیا۔
